Dy sfidat kulmore të javës së pestë të Primera Divizionit janë mbyllur me të njëjtin rezultat, 1-1.
Të zhvilluara njëra pas tjetrës në orët e mbrëmjes të së mërkurës, ato kanë qenë ndeshje me ritëm, të luftuara fort nga palët kundërshtare, e me momente të bukura.
Fillimisht ka qenë Vilareali që i ka bërë një surprizë të pakëndshme Realit të Madridit në “Santiago Bernabeu”, duke i ndërprerë serinë e gjatë të fitoreve.
Nëse Reali do të fitonte mbrëmë, do të arrinte fitoren e 17-të radhazi, e do të thyente rekordin e Barcelonës në sezonin 2010-2011, kur fitonte 16 takime rresht. Barazimi thjesht i bën dy skuadrat më të mira spanjolle të ndajnë të njëjtin rekord.
Sergio Ramos ka qenë përcaktues në ndeshje, duke u shndërruar në pak minuta nga i keqi në të mirin, siç vetëm ai di të bëjë.
Një prekje e topit me dorë nga ai sjell një 11-metërsh në fundin e pjesës së parë, të shndërruar mjeshtërisht në gol nga Bruno për Vilarealin. Me të nisur pjesa e dytë, është po Sergio Ramos që bën protagonistin, duke i barazuar shifrat, të pandryshuara gjer në fund të lojës.
Reali pati një numër rastesh për të shënuar, por edhe Vilareali mund të kishte fituar fare mirë nëse lojtarët miq do të kishin qenë më të kthjellët në kundërsulmet e tyre.
Me gjithë barazimin, Reali i Madridit mban vendin e parë në renditjen e kampionatit spanjoll, me 13 pikë.
Barcelona ka patur iniciativën në përballjen me Atletikon e Madridit, por nuk ia ka dalë ta kthejë epërsinë në lojë në epërsi në rezultat.
Katalanasit kanë këmbëngulur gjatë për të shënuar, ndërkohë që goli ka ardhur në minutën e 41-të, kur
ka realizuar Rakitic.
Veçse zotërimi i topit në 72 për qind të lojës, tetë goditjet e këndit ndaj dy të kundërshtarit, nuk i kanë sjellë tre pikët e dëshiruara.
Kthesa ka ardhur në minutën e 59, kur Messi lë lojën i dëmtuar, për t’ia lënë vendin turkut Arda Turan. Dy minuta më pas barazon Atletiko e Madridit, falë golit të shënuar nga Correa.
Presioni i ushtruar në minutat e fundit ka rezultuar i pasuksesshëm për vendasit, me lojtarët që e kanë lënë fushën pas një barazimi 1-1.
Më tepër se barazimi, te katalanasit ka sjellë mërziti dëmtimi i Messi-t, që do ta pengojë atë të luajë në tre javët e ardhshme. /tesheshi.com/
