Ka qenë vetë Departamenti i Shtetit që ka lajmëruar se SHBA-të dhe Kuba kanë arritur një marrëveshje dypalëshe për të rifilluar fluturimet e rregullta ajrore mes dy vendeve. Rinisja e tyre për herë të parë në më tepër se pesë dekada mundëson 110 fluturime vajtje-ardhje në ditë midis dy vendeve.
Njoftimi për arritjen e marrëveshjes erdhi vetëm një vit pasi udhëheqësit e dy vendeve patën lajmëruar për rivendosjen e marrëdhënieve diplomatike, të konkluduara me hapjen e ambasadave përkatëse në korrikun e shkuar.
Marrëveshja për fluturimet ajrore i sjell më pranë dy vendet që kanë kaluar një periudhë të gjatë armiqësie, dhe është hapi më i fundit në përpjekjet për të eliminuar kufizimet në fushën e tregtisë dhe turizmit.
Megjithatë, embargoja tregtare amerikane ndaj Kubës vazhdon të jetë në zbatim, e po ashtu mbetet ende ndalimi i amerikanëve për të udhëtuar për në Kubë për qëllime turizmi, ka kujtuar Departamenti i Shtetit. /tesheshi.com/
