Nga Vepror Hasani
Të gjitha rrugët nacionale të rajonit Juglindor janë të hapura. Ende mbetet i nevojshëm përdorimi i zinxhirëve, por përmirësime në cilësinë e qarkullimit shënohen vazhdimisht. Mjetet e pastrimit të rrugëve janë duke punuar. Qafat e maleve nuk janë më aq të frikshme si në çastet e para të fillimit të rreshjeve, kur sasi të mëdha bore mbuluan gjithë rajonin. Sikur të mos mjaftonin të gjitha këto, temperaturat e ulta shndërruan në akull gjithçka. I ftohti ishte i papërballueeshëm. Në zonat e larta malore trashësia e dëborës shkoi në 70 cm, diku edhe më shumë. Korça është vendi i dëborës. Gjithçka erdhi krejt papritur, ashtu siç ndodh gjithnjë me kapriçiot e motit. Rajoni Juglindor i Korçës rrezikonte izolimin total. Nëse do të ndodhte kështu, njerëzit do të përballeshin me të papritura dhe nevoja emergjente. Të keqes i duhej dalë përpara pa u përkeqësuar situata, pasi në të kundërt përballja me katastrofën do të ishte e pashnagshme. Së paku të gjitha boshtet kryesore të rajonit që lidhin fshatrat me qytetet dhe qytet me njër-tjetrin duhej të mbaheshin të hapura, të ishin në shërbim të çdo çasti emergjent. Prefekti i Korçës, Dhori Spirollari, si gjithnjë u gjend atje ku gjendja ishte më e vështirë.
Përvoja e krijuar
Në raste të tilla, banorët e Korçës, të mësuar me përpjekjet e pakursyera të Prefektit të Korçës, Dhori Spirollari, presin të dëgjojnë në media lajmet e para për zhbllokime rrugësh, qafa malesh, për akse që çojnë drejt zonave rurale dhe gjithë akset e tjera nacionale që përshkojnë rajonin Juglindor të vendit. Tashmë të gjithë e dinë: prefekti Spirollari niset vetë i pari drejt rrugëve që mund të bllokohen, qëndron aty bashkë me punonjësit e shoferët e borëpastrueseve dhe punonjësit e Policisë së Qarkullimit Rrugor; janë aty edhe kur nata ka rënë. Beteja, me rreshjet që vijnë pareshtur, me akullin që vesh rrugët dhe i bën të rrezikshme, me erën që fryn e mbush sërish rrugën nga e para dhe me temperaturat e ulta, duhet fituar medoemos. Dhe lajmet që vijnë nëpërmjet mediave janë gjithnjë të vërteta. Prefektit Spirollari nuk i pëlqen të zbukurojë. Sipas tij, “nuk ka gjë më të dobishme se e vërteta, dhe më të dëmshme se zhgënjimi; njerëzit duhet ta njohin realitetin ashtu siç është. Aty ku ka bllokime, ka bllokime, dhe e vërteta duhet thënë pa hezitim Vetëm atëherë njerëzit nuk ngurojnë të bëhen pjesë e zgjidhjes dhe aq më shumë kur shohin titullarët e tyre të bëjnë të pamundurën”. Rezultatet e sjella nga përvoja e Spirollarit kanë qenë të dukshme dhe të suksesshme.
Lajmet e para
Lajmet e para që mbërritën në media për rajonin Juglindor bënin fjalë për reshjet të dendura bore. Trashësia më e vogël ishte 20 cm, në Qafën e Thanës 30, në Voskopojë 40, në Dardhë 70 cm dhe diku tjetër edhe më shumë. Zonat e thella malore të Korçës, të Devollit, të Kolonjës dhe të Pogradecit po përballeshin me vështirësi për shkak të reshjeve të shumta. Kryelajm u bë informacioni që fliste për jetën e njerëzve: “Deri më tani nuk ka patur asnjë rast emergjent. Ushqimi për njerëzit dhe bagëtinë ishte i garantuar”. Të gjitha këto u bënë të njohura nga vetë prefekti i Korçës, Dhori Spirollari. “Të bllokuara,- tha ai,- rezultojnë Mokra e Poshtme, Gora dhe malësia e Kolonjës. Në rast se nga ana e tyre do të kërkohet ndihmë, ne jemi në gatishmëri të plotë për t’iu përgjigjur sa më shpejt që të jetë e mundur, ashtu siç po bëjmë edhe me aksin rrugor të Dardhës, të cilin po përpiqemi ta mbajmë të hapur vazhdimisht edhe pse bora e madhe herë pas herë arrin ta bllokojë. Gjithsesi, ne po ia dalim ta mbajmë hapur”.
Nuk pati raste emergjencash
“Raste shëndetësore nuk ka patur,- nënvizoi prefekt Spirollari,- boshtet kryesore i mbajtëm të hapura dhe nuk u krijuan probleme për këto lloj emergjencash. Falenderojmë zonat e thella të Korçës, të Kolonjës dhe të Leskovikut, të cilat të mësuara më dëborën dhe dimrin e ashpër të rajonit kanë krijojnë rezerva ushqimore, ndaj deri më tani nuk kemi marrë asnjë kërkesë për ndihmë. Sigurisht, në rast se do të ketë kërkesa, ne do të ofrojë zgjidhjet tona për të qenë pranë njerëzve në nevojë”. Sipas prefektit Spirollari, probleme ishin hasur edhe në rrugën e Linit, për shkak të punimeve për rikonstruksionin e këtij aksi. Probleme ishin vërejtur edhe te drejtuesit e mjeteve me moshë të re, të cilët në mungesë të përvojës, ndjenin pasiguri në drejtimin e mjetit. Për këta të fundit nga ana e Policisë së Qarkullimit Rrugor, u ofrua një ndihmë e nevojshme përmes këshillave si duhej vepruar në raste të tilla. Prefekti falendëroi edhe punonjësit e pastrimit të rrugëve: “Unë dua të falendëroj të gjithë punonjësit e firmave kontraktore që punojnë në aksin Qafë-Thanë- Kapshticë, veçanërisht ata të Qafë-Thanës dhe të Qafës së Qarrit, të cilët punuan në kushtet e temperaturave të ulta dhe arritën ta përballojnë situatën me sukses. Ndërkaq Prefekti i Qarkut Korçës, Dhori Spirollari bëri të ditur se po ppunohet edhe për zhbllokimin e rrugëve rurale. /tesheshi.com/
