Komisioni i Venecias do të japë përgjigjen përfundimatare ditën e nesërme ndaj pyetjeve të ngritura nga Gjykata Kushtetuese mbi kushtetutshmërinë e disa dispozitave në ligjin e Vettingut. Ky fakt u bë i ditur nga ambasadorja e Bashkimit Evropian, Romana Vlahutin, teksa mbajti një fjalim për ditën e korrupsionit. Ajo tha se Reforma në Drejtësi nuk do të vonojë nga nisja e zbatimit, ndërsa sugjeroi që çdo skenar tjetër do ishte mirë të shmangej.
“Ajo çka është e mirë është se që në fillim të këtij proces të gjithë ata që kanë qenë pjesë e tij, që nga partitë politike deri te institucionet e Parlamentit, Qeverisë dhe Presidencës e kanë pranuar me vendosmëri se Komisioni i Venecias është pika kyçe e referencës. Ne shpresojmë që opinioni i Komisionit të Venecias do të japë udhëzime të qarta në mënyrë që vetingu të nisë, që reforma e drejtësisë të mund të zbatohet dhe që Shqipëria të ecë në udhën e saj drejt Bashkimit Evropian. Çdo skenar tjetër nuk do të ishte i mirë dhe do ta vononte progresin dhe përfitimet e tij për qytetarët”, u shpreh Vlahutin.
Ajo foli edhe për nivelin e korrupsionit në Shqipëri, fenomen që sipas saj, duhet të luftohet duke nisur nga institucionet e drejtësisë e më lart.
“Ekziston gjithashtu edhe një korrupsion i një shkalle më të lartë që sjell kosto shumë të larta për komunitetin dhe ku paratë në vend që të shkojnë për shkolla, spitale apo rrugë të mira, shkojnë në xhepa privatë. Lufta kundër korrupsionit është një luftë e vazhdueshme që kërkon institucione funksionale, gjyqësorin para së gjithash, dhe qytetarë vigjilentë. Korrupsioni ndodh kudo, por ajo çka ndryshon është kapaciteti dhe gatishmëria e institucioneve për ta luftuar atë”, u shpreh ambasadorja e BE-së./tesheshi.com/
