Nuk vonon asnjë minutë dhe do hyjë në fuqi plani ndërkombëtar për pastrimin e sistemit të drejtësisë në Shqipëri.
Menjëherë pas nisjes së komisioneve të vettingut nga parlamenti, të cilat tashmë do të fillojnë sitjen e kandidaturave të institucioneve më të larta të gjyqësorit të ri, qeveria gjermane ka nisur zbatimin e planit për të konkretizuar “gjuetinë” ndaj pasurisë së fshehur të gjyqtarëve dhe prokurorëve shqiptarë.
Burime diplomatike i thanë tesheshi.com se përfaqësuesi më i lartë ndërkombëtarë në Misionin Ndërkombëtar të Monitorimit, Reihnard Priebe, ka urdhëruar zbatimin e planit të hetimit që është zhvilluar në fakt prej kohësh nga Inspektorati i Lartë i Deklarimit dhe Kontrollit të Pasurive, me të dhëna të ruajtura në një server të posaçëm, të cilat u tentuan të sekuestrohen nga Prokuroria e Përgjithshme.
Ndërkaq, vetë ILDKP ka zbardhur raportin vjetor të 2016, ku bie në sy fakti se gjatë këtij viti do të ketë një asistencë të madhe nga Gjermania dhe Austria, në kontrollin e pasurisë së funksionarëve të lartë.
“Gjatë vitit raportues, ILDKPKI ka vazhduar bashkëpunimin e ngushtë dhe të frytshëm me Delegacionin e Bashkimit Europian në Shqipëri, me agjencitë e Shteteve të Bashkuara të Amerikës si OPDAT, USAID, Këshillin e Europës, zyrën e OSBE-së në Tiranë etj.
Në këtë kuadër, ILDKPKI, gjatë vitit 2016 u përfshi në Projektin e Binjakëzimit ‘Mbështetje për hartimin, koordinimin dhe zbatimin e politikave kundër korrupsionit’, projekt ndërmjet Austrisë, Gjermanisë dhe Shqipërisë, i financuar nga BE, i vlerësuar si një nga projektet më të mëdha mbi politikat kundër korrupsionit, të financuar ndonjëherë nga BE në Shqipëri”, thuhet në raport.
Sipas ILDKP-së, projekti i binjakëzimit ka filluar zbatimin nga 9 shtatori 2016, për një kohëzgjatje prej rreth 30 muajsh, ku ky institucion do të jetë përfitues në disa komponentë kryesorë të tij: asistencë në hartimin e akteve nënligjore dhe udhëzimeve apo akteve të tjera relevante, për zbatimin e ndryshimeve në ligjin “Për deklarimin e pasurive”; cikël trajnimesh mbi metodat e kontrollit të pasurive në përputhje me aktet ligjore dhe nënligjore të ndryshuara, sipas nevojave të ILDKPKI-së dhe si rezultat i reformës në drejtësi; trajnim i stafit të ILDKPKI mbi bashkëpunimin dhe shkëmbimin e eksperiencave më të mira ekzistuese, në lidhje me deklarimin e pasurive, etj.
Në raport është deklaruar se gjatë vitit 2016 janë kallëzuar penalisht 72 zyrtarë, të cilët nuk kanë deklaruar në kohë pasuritë. Nga ana tjetër, aty është thënë se rreth 1.700 zyrtarë janë kontrolluar për pasuritë e tyre. “Inspektorati i Lartë, gjatë vitit 2016, në zbatim të nenit 25/1 të ligjit nr. 9049, datë 10.4.2003, “Për deklarimin dhe kontrollin e pasurive…”, i ndryshuar, si dhe në përmbushje të objektit kryesor të veprimtarisë së tij; lidhur me ushtrimin e kontrollit të plotë dhe hetimit administrativ për vërtetimin e saktësisë dhe vërtetësisë së të dhënave të pasurive, të ardhurave e detyrimeve të deklaruara nga zyrtarët dhe personat e lidhur me ta, konstatimin e rasteve të konfliktit të interesave; ka miratuar dhe ka kaluar në kontroll të plotë, në total 1.709 subjekte deklarues, nga të cilët, 1.667 subjekte janë kontrolluar për shkak funksioni. Krahasuar me numrin e subjekteve deklarues, të cilët i janë nënshtruar kontrollit të plotë një vit më parë, konstatohet një rritje prej 109 subjektesh të rinj (në vitin 2015 u ushtrua kontroll i plotë për rreth 1.600 subjekte)”, thuhet në raport. Sipas këtij institucioni, zyrtarët e ndëshkuar me masa administrative, gjobë, për periudhën deri 31.12.2016, janë në total 1.264.
Pra bëhet fjalë për 1200 pjesëtarë të gjyqësorit që janë prekur nga ILDKPKI duke e shënuar emrin e tyre me të kuqe, çka do të ndikojë në uljen e pikëve gjatë vettingut.
Megjithatë këtu ka një kleçkë. Kjo ka të bëjë me emrin e deputetëve që dje nga opozita u emëruan në komisionet e vettingut, të cilët do të vendosin me vota nëse gjyqtarët e prokurorët do të rrijnë apo do të ikin.
Në komisionin e vettingut, është caktuar edhe kreu i PR-së, Fatmir Mediu, i cili ka një precedent që është gjykuar nga drejtuesia aktuale për katastrofën e Gërdecit, por që është pezulluar çështja ndaj tij me procedurë.
Pikëpyetja është nëse z.Mediu ka një konfikt interesi në trajtimin e gjyqtarëve dhe prokurorëve apo do të veprojë sipas ndërgjegjes dhe fakteve konkrete.
Megjithatë këtu ka një kazus juridik që i jep rëndësi ndërkombëtarëve. Komisioneve të vettingut, MNM-ja, pra ndërkombëtarët, do t’u dërgojnë materiael të plota argumentuese mbi çdo gjyqtar dhe prokuror që do të kalojë sitën. Nëse edhe kur ka fakte, ato do të anashkalohen, ndërkombëtarët kanë të drejtë t’i bëjnë ato publike. /tesheshi.com/
