Nga Blendi Gashi
Ndërsa të mërkurën është caktuar seanca plenare ku do votohet mocioni opozitar për rrëzimin e qeverisë, dhe kur qershori po shihet si muaji i zgjedhjeve parlamentare, partitë kanë nisur kalkulimet parazgjedhore.
Dhe pikërisht këto kalkulime me synim marrjen e pushtetit kanë bërë që Lëvizja Vetëvendosje të “dorëzohet” dhe pas disa vitesh operimi si iniciativë qytetare brenda pak ditësh pritet të marrë statusin e partisë politike.
VV, tashmë ka aplikuar në Komisionin Qendror të Zgjedhjeve, ku edhe ka dorëzuar dokumentacionin e nevojshëm dhe kërkesa për regjistrim është në procedurë të shqyrtimit administrativ në zyrën e regjistrimit dhe certifikimit të partive politike.
Arsyeja e një veprimi të tillë të VV-së, është për shkak se ligji ua pamundëson iniciativave qytetare koalicionet parazgjedhore.
Këtë e ka konfirmuar për tesheshi. com edhe Adnan Rrustemi, zyrtari i VV-së në KQZ.
“Ditë më parë, Lëvizja Vetëvendosje ka dorëzuar dokumentacionin e nevojshëm për kalimin nga statusi i iniciativës qytetare në statusin e partisë politike të regjistruar, si subjekt politik. Kjo po bëhet krejtësisht për shkak se ligji aktual për zgjedhje në mënyrë të padrejtë dhe aspak demokratike ua pamundëson iniciativave qytetare krijimin e koalicioneve parazgjedhore. Prandaj, duke qenë se koalicione parazgjedhore në kuptimin ligjor dhe të certifikuara nga KQZ-ja mund të bëjnë vetëm partitë politike të regjistruara paraprakisht dhe në anën tjetër pritjet e mëdha të qytetarëve për ndryshimin e qeverisjes në Kosovë e ka bërë të nevojshëm që për arsye krejtësisht praktike të regjistrohemi në KQZ, duke i hapur kështu mundësi krijimit të ndonjë koalicioni të mundshëm parazgjedhor.
Aktualisht, kërkesa është në fazën përfundimtare dhe më së largu javën e ardhshme duhet ta kemi edhe vendimin e KQZ-së për regjistrim. Duke qenë se Lëvizja Vetëvendosje është një subjekt politik parlamentar dhe që tashmë ka marrë pjesë në disa palë zgjedhje nga viti 2010 si subjekt politik, kërkesa për regjistrim dhe shqyrtimi i saj është një formalitet, andaj edhe presim që procesi i regjistrimit dhe vendimi i KQZ-së të përfundojë në një kohë sa më të shpejtë”, ka thënë Rrustemi, për tesheshi. com.
Ja koalicionet e mundshme parazgjedhore…
Ndërsa VV ka pranuar se po bëhen parti për të pasur mundësinë të lidhin koalicione parazgjedhore me ndonjë nga partitë, zyrtar të saj nuk janë përgjigjur nëse do garojnë vetëm si parti apo do lidhin koalicion parazgjedhor.
Pavarësisht kësaj, burime tona bëjnë të ditur se VV është duke biseduar aktualisht për të lidhur një koalicion parazgjedhor me partinë më të re Alternativën e Ilir Dedës dhe Mimoza Kusarit.
Poashtu, sipas burimit VV po shqyrton mundësinë të lidh koalicion parazgjedhor edhe me Aleancën Kosova e Re të Behgjet Pacollit, si dhe nuk përjashtohet mundësia që në zgjedhje opozita të dalë me një listë të përbashkët ku do përfshiheshin edhe figura nga shoqëria civile.
Deputeti Rexhep Selimi, në një intervistë dhënë javë më parë për tesheshi. com ka lënë të hapur mundësinë që opozita të garojë së bashku në zgjedhje.
“Lëvizja Vetëvendosje është e gatshme për bashkëpunim opozitar, pasi mendon se ky pushtet, kjo qeveri duhet patjetër të shkoj në opozitë, për shkak se kur të shkojnë në opozitë edhe drejtësia do t’i ketë duar më të lira për t’i vlerësuar punën dhe aktivitetet e tyre joligjore gjatë qenit të tyre në pushtet. Lëvizja Vetëvendosje do preferonte (një front të përbashkët), por nuk mund t’ia imponoj subjekteve tjera, apo t’iu vëj kushte të tilla, por shumë më mirë do ishte të jemi sa më të bashkuar edhe në zgjedhje edhe në pushtetin e ardhshëm.”, ka thënë Selimi.
Kujtojmë se AAK dhe NISMA ka kohë që kanë lidhur koalicion paprazgjedhor, por mbetet të shihet në javët në vazhdim nëse do u bashkangjitet edhe VV dhe AKR e Alternativa për të garuar në një listë të vetme zgjedhore.
Ja ç’thotë ligji për zgjedhjet:
Neni 18 – Koalicionet
18.1 Koalicioni mund të certifikohet për të garuar në zgjedhje nën një emër, me kusht që
përbëhet vetëm nga partitë politike që kanë të drejtë për t’u certifikuar sipas nenit 15.4 të këtij
ligji.
18.2 KQZ-ja e trajton koalicionin si një subjekt politik të vetëm nga dita kur koalicioni është
certifikuar nga ajo e deri në certifikimin e rezultateve të zgjedhjeve. Partia politike nuk mund
të tërhiqet nga koalicioni pasi që të jetë certifikuar, derisa rezultatet e zgjedhjeve të
certifikohen.
18.3 Pas shpërbërjes së koalicionit, secila nga partitë politike të regjistruara të cilat kanë qenë
anëtare të koalicionit janë përgjegjëse për një ndarje të të gjitha borxheve të shkaktuara nga
koalicioni në përpjesëtim me marrëveshjen për koalicionin, përfshirë gjobat e papaguara të
ngarkuara nga KQZ-ja apo KZAP-i.
18.4 Partia politike që është anëtare e koalicionit nuk mund të marrë pjesë si anëtare në një
koalicion tjetër apo si parti politike e veçantë në të njëjtat zgjedhje.
Neni 19 – Nisma qytetare
19.1 KQZ–ja e trajton nismën qytetare si subjekt politik nga dita e certifikimit të saj deri sa
nisma qytetare të dorëzojë raportin përfundimtar të Publikimit Financiar të Fushatës sipas
nenit 40.2 (b) të këtij ligji,.
19.2 Secili kandidat i certifikuar i listës së nismës qytetare është personalisht përgjegjës për
ndarje të barabartë të gjobave të ngarkuara mbi nismën qytetare nga KQZ-ja apo KZAP-i. /tesheshi.com/
