Lëvizja Vetëvendosje deklaroi se marrëveshja e fundit mes Kosovës dhe Serbisë për Asociacionin e komunave serbe është legalizim i ndarjes së Kosovës.
Në një konferencë për mediat, shefi i grupit Parlamentar të Vetëvendosje, Glauk Konjufca theksoi se Isa Mustafa dhe Hashim Thaçi e vendosën nënshkrimin në një dokument që e legalizon ndarjen e Kosovës me krijimin e Asociacionit të komunave me shumicë serbe.
“Qëllimi është krijimi i një entiteti territorial serb brenda Kosovës dhe kjo po ndodh me nënshkrimin e politikanëve të Kosovës. Asociacioni që u nënshkrua dje është një autonomi politiko-territoriale e serbëve të Kosovës, dhe jo vetëm atyre që jetojnë në veriun e Kosovës, por e të gjithë serbëve që jetojnë në komunat me shumicë etnike serbe në Kosovë. Kjo do të jetë autonomi politike e kontrolluar nga Beogradi”, ka theksuar Konjufca.
Ai tha se Isa Mustafa e Hashim Thaçi kanë bërë tradhti kombëtare pasi çka në të vërtetë po ndodh është saktësisht bosnjëzimi i Kosovës.
“Meqë politikanët që shkuan atje patën fytyrë që të nënshkruajnë bosnjëzimin e Kosovës, atëherë ne i bëjmë thirrje popullit të Kosovës që të mos na mungojë guximi me kurrfarë mjeti, për ta ndalur krijimin e Asociacionit të komunave me shumicë serbe”, theksoi Konjufca.
Lëvizja Vetëvendosje, sipas tij, do ta kundërshtojë krijimin e këtij asociacioni, duke filluar prej iniciativave të përbashkëta opozitare në Kuvend, e deri tek demonstratat masive gjithë popullore, ku janë të ftuar të gjithë qytetarët e Republikës.
Ndërkaq, kryetari i Vetëvendosjes, Visar Ymeri ka deklaruar se ky asociacion do ta kushtëzojë secilin zhvillim në Kosovë, pavarësisht se a do të jetë i lidhur me asociacionin apo jo.
Ymeri ka thënë se përmes Asociacionit, kryeministri ka hequr dorë edhe nga shtetndërtimi, edhe nga ndërtimi i Republikës dhe në anën tjetër ka hequr dorë edhe nga mundësia për zhvillim ekonomik e social e shtetit të Kosovës.
“Asociacioni do ta ketë dhomën e ndarë e cila do të marrë edhe vendime legjislative dhe do të ketë mundësi t’i zgjerojë kompetencat e veta ekzekutive; do të ketë përfaqësim brenda dhe jashtë vendit – pra, do ta ketë një formë të përfaqësimit të ngjashme me një ministri të punëve të jashtme – me kryetar që do të ketë të drejtë ta përfaqësojë asociacionin jo vetëm brenda por edhe jashtë Kosovës; do të ketë të drejtë të hyjë në marrëdhënie edhe me komuna dhe me asociacione të tjera jashtë Kosovës; do ta ketë buxhetin e vet i cili do të financohet edhe nga të hyrat buxhetore të Kosovës por edhe nga donacionet që vijnë nga jashtë duke përfshirë Serbinë; do ta ketë një zinxhir të ndarë komandues të policisë me një komandant që do të përzgjidhet nga vetë asociacioni; do të ketë të drejtën që të pronësojë dhe themelojë ndërmarrje publike për shërbime brenda asociacionit dhe do të ketë mbikëqyrje të plotë në zhvillimin ekonomik, planifikimin rural dhe urban, çështjet e arsimit, çështjet e shëndetësisë primare dhe sekondare, në çështjet sociale, etj”, ka theksuar ai me tutje.
“Ky vendim, ky nënshkrim i Isa Mustafës, është drejtpërsëdrejti tradhti ndaj Republikës, tradhti ndaj kushtetutës së Republikës dhe tradhti ndaj vullnetit dhe interesave të qytetarëve. Prandaj ky njeri nuk mund të qëndroj më në krye të Qeverisë së Kosovës. Dhe nëse ky nuk jep dorëheqje atëherë e tërë qeveria duhet të dorëhiqet”, ka thënë në fund Ymeri. /tesheshi.com/
