Lëvizja Vetëvendosje denoncoi pranimin nga ana e qeverisë të dy përcaktimeve kundërta për pronësinë, e kjo është rregulluar me marrëveshjet e nënshkruara në Bruksel mes kryeministrave Mustafa e Vuçiç.
Sipas vetëvendosjes, në marrëveshje thuhet që Kosova konsideron në bazë të kushtetutës së vet, ligjeve të veta dhe ligjit ndërkombëtar, që prona që gjendet brenda territorit është pronë e Kosovës. Në paragrafin tjetër thuhet që Serbia konsideron se në pajtim me ligjin vendor dhe ndërkombëtar, si dhe rezolutën 1244, prona brenda territorit të Kosovës është në pronësi të Serbisë, nën rregullimin specifik krahinor dhe në pajtim të plotë me Kushtetutën e Serbisë.
Kreu i Vetëvendosjes, Visar Ymeri theksoi se Isa Mustafa me nënshkrimin e kësaj marrëveshjeje, pranon idenë serbe për pronën në Kosovë dhe konteston pronësinë e Kosovës brenda territorit të saj.
“Prej se është çliruar Kosova nga Serbia, çështja kryesore në sektorin e energjisë ka qenë pikërisht pavarësimi i këtij sektori nga Serbia, në mënyrë që ky sistem i pavarur të lidhet më pas dhe të unifikohet me sistemin energjetik të Republikës së Shqipërisë, dhe kështu të dyja vendet t’i rrisin kapacitetet e veta të gjenerimit dhe të furnizimit me energji elektrike, përmes kombinimit të termoenergjisë që e kemi ne dhe hidroenergjisë që e ka Shqipëria. Ky proces negociator, veçanërisht kjo marrëveshje e fundit, po e kthen prapa këtë tendencë të bashkëpunimit dhe unifikimit të dy sistemeve mes Kosovës dhe Shqipërisë, sepse po e rilidh edhe më fuqishëm sistemin e Kosovës me atë të Serbisë, ku Kosova natyrisht është e nënvendosur”, ka deklaruar Ymeri.
Ndërsa drejtuesi i komitetit për Energjetikë, prof. Naim Hoxha, ka thënë se është plotësisht gabim futja e KEDS-it në këtë marrëveshje.
“KEDS ka kontratë me Kosovën e, jo me Serbinë. Cilido që të jetë raporti i Kosovës me “ElektroServer”, raportet e këtij të fundit me KEDS dhe institucionet tjera nuk mund të jenë pjesë e marrëveshjeve ndërkombëtare të Kosovës me këdo qoftë”, tha ai. /tesheshi.com/
