Tashmë është radha e PDK-së që të rebelohet dhe të rrëshqasë në praktikën e bojkotit. Pamundësia e formimit të qeverisë, si dhe avantazhi i VV-së në skenën politike falë rezultatit që morri në zgjedhje, ka bërë që partia e dyshes Thaçi – Veseli ta humbë toruan.
Kështu, pak orë pasi u vendos që seanca konstituive të mbahet të premten, PDK ka dalë në një konferencë për media ku përmes zëdhënësit Blerand Stavileci ka bërë të ditur se PAN-i nuk do të marrë pjesë as në seancën e të premtes.
“PDK është e vendosur dhe nuk i nënshtrohet diktatit politik. Ne i sigurojmë qytetarët dhe votuesit e PDK-së që do ta respektojmë vullnetin e tyre. PDK vazhdon të jetë garanci për të ardhmen”, tha ai.
Stavileci më pas shtoi se përpjekjet “e subjekteve humbëse” për krijimin e institucioneve do të dështojnë.
“Mentaliteti uzurpues dhe manipulues i partisë Vetëvendosje dhe koalicionit të LDK-së është shqetësues, jo vetëm për situatën aktuale, as vetëm për një pozicion politik siç mund të jetë pozita e kryeministrit apo kryeparlamentarit, por për kushtetutshmërinë dhe vullnetin e cenuar qytetar, duke krijuar kështu precedentë që nuk i japin zgjidhje problemit, por e legjitimojnë metodën e tyre uzurpatore për shtetin dhe institucionet”, tha ai.
Stavileci pretendoi po ashtu se deputetë të caktuar janë shantazhuar.
“Ne sot kemi pasur një arenë… E keni parë çfarë kanë bërë deputetë të caktuar, e keni parë deputetin e LDK-së se çfarë ka bërë në Facebook. Pastaj e keni parë udhëheqjen e kryesuesit i cili ka pasur presion nga deputetë të caktuar. Mentaliteti uzurpues dhe manipulues i Vetëvendosjes dhe LAA-së e cenoi vullnetin qytetar dhe nuk i jep zgjidhje problemit”, tha Stavileci. /tesheshi.com/
