Një grup veteranësh e të cilët protestuan të hënën para godinës së qeverisë për të kërkuar pensionet e tyre, të cilat janë ndaluar që nga gushti për shkak të mos shqyrtimit të buxhetit, kanë paralajmëruar nisjen e një greve, nëse kërkesa e tyre nuk zgjidhet deri më 25 tetor.
Përfaqësuesit e veteranëve së pari takuan kryeministrin Haradinaj por ky i fundit u ka thënë se problemi nuk është te ata, por te Kuvendi që nuk e ka votuar rishikimin e buxhetit.
Sipas tyre, Haradinaj u ka thënë se i ka dhënë një muaj kohë Prokurorisë për të hetuar listat e veteranëve.
Më pas veteranët janë drejtuar tek zyra e kryekuvendarit Veseli ku janë pritur nga këshilltari e tij, Ilmi Ramadani. Ky i fundit u ka thënë se Kuvendit i duhen 20 deri në 40 ditë për ta kaluar rishqyrtimin e buxhetit të Kosovës.
Megjithatë, veteranët kanë thënë se do të presin vetëm edhe 16 ditë dhe nëse nuk dalin pensionet, do të nisin grevën. /tesheshi.com/
