Takimi i së martës i lidërve politikë në Maqedoni, ka nuk ka dhënë asnjë epilog, pasi ka shërbyer vetëm për t’i informuar Ali Ahmetin dhe Menduh Thaçin për detajet nga bisedimet që u zhvilluan në Strazburg më 19 maj.
Së paku, ky është versioni zyrtar të cilin e kumtuan përfaqësuesit politik pas takimit, ndërkohë informuan se akoma nuk është dakorduar korniza për negociata.
Kryeministri Gruevski përsëri shmangu gazetarët dhe u largua pa dhënë sqarime, ndërkohë lideri opozitar Zoran Zaev, gazetarëve u tha se pret që negociatat të nisin javën tjetër. Ai paralajmëroi vazhdimin e të ashtuquajturave “Bomba” të përgjimeve të cilat sipas tij do të publikohen përpara qeverisë.
Burime brenda LSDM-së, informuan se Zaev do të realizojë premtimin se do të publikojë të gjitha audio-materialet që i ka në dispozicion dhe kjo do të bëhet pavarsisht epilogut nga bisedimet të cilat synojnë dalje nga kriza e thellë politike.
Të njëjtat burime informuan se shpalosja e nesërme ka të bëjë me mbylljen e televizionit A1, vrasjen e pesëfishtë të liqeni i Smillkovcit, që njihet si rasti Monstra, dhe për aksionet policore të njohura si “Detonatorë” dhe “Spiun”
Portali Ohridsky që është i afërt me opozitën, ka dalë me një artikull në të cilin shkruan se pas shpalosjes së përgjimeve për ‘Monstrën’, deshëm apo jo, Maqedonia nuk do të jetë më e njëjta, pasi opinioni do ta kuptojë se kush ka porositur vrasjen e pesëfishtë: “Nga ky akt, nuk do të tmerrohen vetëm maqedonasit, por të gjithë qytetarët. Atëherë do të shohim se kush është tradhëtari dhe cila Maqedoni mbrohet”, shkruan Ohridsky duke aluduar në zyrtarë qeveritarë të përfshirë në vrasjen. /tesheshi.com/
