Veseli në Mitrovicë: Shqiptarët do të kthehen në shtëpitë e tyre

Ndërsa Albin Kurti i VV-së, ka premtuar bashkimin e Mitrovicës, Kadri Veseli i PDK-së në tubimin e mbajtur në qytetin e ndarë ka premtuar se nuk do ketë mure dhe trena, e as struktura paralele, por rindërtim të shtëpive të shqiptarëve në veri.
“Ka marr fund Serbia në Kosovë dhe kurrë më s’do të ketë. Jemi njerëz tolerant dhe që e respektojmë njëri tjetrin. Do t’i respektojmë komunitet dhe do jemi të barabartë para ligjit. Do t’i largojmë strukturat paralele serbe nga shteti ynë. Nuk do t’i lejomë ato mbeturina. Shqiptarët do të kthehen në pronat e tyre, dhe do të fillojmë me rindërtimin e pronave në veri.

Do të jetojmë në një qytet siç i ka hije Mitrovicës. Fillimi i Ri nënkupton edhe përkrahje për artdashësit dhe sportin në Mitrovicë të fuqizohet pasi mitrovicasit janë sportdashësit më të mëdhenj”, ka deklaruar Veseli, ndërsa ka premtuar se Mitrovica do të jetë krenaria industriale e Kosovës.
Edhe kryetari i PDK-së-dega në Mitrovicë, Avni Kastrati, premtoi se do vahdohet me ndërtimin e shtëpive të shqiptarëve në veri.
“Të vazhdohet me rindërtimin e shtëpive në veri të Mitrovicës. Deri më tash 220 shtëpi janë ndërtuar gjatë mandatit të PDK-së. Qyteti i Mitrovicës ka qenë qytetet i zhvillimit të sportit, rinisë dhe kulturës. Presim që edhe kompleksi i Universitetit ‘Isa Boletini’, të mbarohet sa më parë. Presim që Mitrovicës t’i kthehet nami i mbetur si qyteti më i mirë në Kosovë”, tha Kastrati./tesheshi.com/