Kuvendi i Kosovës sot ka mbajtur seancë solemne kushtuar 25 vjetorit të shpalljes së Deklaratës Kushtetuese, më 2 Korrik 1990.
Seancën e ka nisur kryeparlamentari Kadri Veseli, i cili ka thënë se ndihet i nderuar që prezent në sallën e Kuvendit janë deputetët të cilët kanë qenë prezent në vitin 1990 me leximin e kësaj deklarate.
“Në këtë ditë, 25 vite më parë, delegatët e Kuvendit të atëhershëm të Kosovës, nxorën deklaratën kushtetuese.
Sot, kemi nderin t’i kemi këtu në Kuvendin e Kosovës të Lirë dhe të Pavarur, dhe njëkohësisht, të shprehim nderim për ata delegatë që tash nuk janë në mesin tonë. Deklarata Kushtetuese e 2 korrikut të vitit 1990 përbën një moment të rëndësishëm në historinë e lëvizjes sonë kombëtare të gjysmës së dytë të shekullit XX”, ka thënë z. Veseli.
Ai po ashtu ka deklaruar se shqiptarët nuk mund të mashtroheshin me masa gjysmake ekonomike dhe politike. Duhej dhënë fund diskriminimi kombëtar që shqiptarëve u bëhej në të gjitha nivelet e sistemit jugosllav. Barazi ose shkëputje – Ky ishte vullneti politik i asaj kohe.
Ai më tej ka shtuar se me 1989 Serbia përmes dhunës policore ndërmori agresionin kushtetues ndaj Kosovës. Përmes këtij agresioni Kosovës iu hoqën të drejtat kushtetuese të vitit 1974.
1 vit më pas delegatët e Kuvendit të Kosovës bën atë që ishte vullneti politik i kohës i qytetarëve, Përmes deklaratës kushtetuese anuluan agresionin kushtetues të Serbisë të marsit ’89 dhe njëkohësisht avancuan shumë të drejtat kushtetuese të Kosovës. Kosova bëhej subjekt i barabartë politik me republikat tjera të ish Jugosllavisë.
Ishte një veprim i duhur dhe në momentin e duhur. Jugosllavia komuniste nuk kishte gjasa për të mbijetuar dhe duke aneksuar Kosovën, Serbia synonte që në shpërbërjen e Jugosllavisë Kosova të mos figuronte fare si çështje ndërkombëtare. Kësisoj Serbia synonte të shkatërronte bazën legale të së drejtës së Kosovës për shkëputje. Përkundër kësaj Deklarata Kushtetuese e 2 korrikut ishte avancim i kësaj baze legale. Me 1999 ne nuk fituam vetëm lirinë, por fituam edhe rreshtimin në anën e drejtë të historisë, në anën e demokracive perëndimore.
Falë këtij rreshtimi ne ecëm më tutje, e bëmë Kosovën shtet të pavarur dhe tani po e konsolidojmë këtë shtet për ta bërë të gatshëm për integrimet euro-atlantike. Prandaj për ne ky rreshtim është dhe do të mbetet vlerë e pacenueshme kombëtare. Ne besojmë në këtë vlerë, ka thënë Veseli para delegatëve të atëhershëm të Kosovës./tesheshi.com/
