Maqedonia poritet të nënshkruajë protokollin për pranimin në NATO të mërkurën e ardhshme në selinë e Aleancës në Bruksel.
Gjatë ceremonisë, ministri i Punëve të Jashtme i Maqedonisë do të nënshkruajë protokollin e pranimit në prani të ambasadorëve të vendeve anëtare të NATO-s.
Teksti u miratua në të ashtuquajturën “procedurë të qetë”, të hënën e kaluar.
Pas nënshkrimit të Protokollit, ky dokument duhet të ratifikohet në parlamentet kombëtare të 29 vendeve anëtare të NATO-s.
Nëse çdo gjë shkon sipas planit, ministrja maqedonase e Mbrojtjes, Radmila Shekerinska do të marrë pjesë për herë të parë në një takim ministror të vendeve anëtare të Aleancës më 13 shkurt, por pa të drejtë vote derisa Maqedonia të bëhet anëtare e plotë.
Greqia me shumë gjasa të jetë një vendi i parë që simbolikisht do të ratifikojë protokollin mbi pranimin e Maqedonisë në NATO, siç është paralajmëruar nga portali EurActiv duke iu referuar burimeve të brendshme në Bruksel.
Sipas burimeve të EurActiv, teksti zyrtar i protokollit të pranimit u miratua të hënën dhe 29 përfaqësues të përhershëm të NATO-s po presin për miratimin e vendeve të tyre për ta nënshkruar atë.
“Greqia dëshiron ta ratifikojë protokollin deri më 8 shkurt”, tha burimi, duke shtuar se Athina ndoshta do të jetë e para që do të hapë derën e NATO-s për Maqedoninë.
Qeveria gjermane njoftoi të enjten pëlqimin e saj për pranimin e Maqedonisë në NATO dhe u zotua që procesi i pranimit të përfundojë shpejt.
Njoftimi i qeverisë gjermane thotë se hyrja e Maqedonisë në Aleancë do të japë një kontribut të rëndësishëm në sigurinë e zonës euroatlantike dhe do të sigurojë gjithashtu një shtysë të rëndësishme për stabilizimin e mëtejshëm të Ballkanit Perëndimor.
Qeveria gjermane është në favor të miratimit të shpejtë të Protokollit për të siguruar pranimin formal deri në fund të muajit të ardhshëm.
Deklarata shton se “Maqedonia Veriore në politikën e jashtme luan një rol konstruktiv në Ballkanin Perëndimor”.
“Ajo është bërë veçanërisht e dukshme në gatishmërinë e saj për të pranuar ndryshimin e emrit në negociatat me Greqinë në qershor të vitit të kaluar”, tha deklarata. /tesheshi.com/