Nga Blendi Gashi
Opozita kosovare ka humbur edhe një betejë ndaj pushtetit. Pas dështimit për të rrëzuar qeverinë aktuale, ka dështuar të parandalojë edhe zgjedhjen e Hashim Thaçit president të vendit.
Goditjen e radhës opozitarët e morën nga Gjykata Kushtetuese e Kosovës e cila e rrëzoi kërkesën e opozitarëve që kontestuan zgjedhjen e Thaçit në krye të Preisdencës, duke thënë se ish-kreu i PDK-së është zgjedhur në mënyrë të ligjshme në krye të shtetit.
Në vendim thuhet se “Gjykata vëren se parashtruesit nuk kanë paraqitur ndonjë argument në lidhje me përmbajtjen e vendimit të kontestuar”.
Në fillim të muajit mars, tri partitë opozitare, Vetëvendosje, Aleanca për Ardhmërinë e Kosovës dhe NISMA për Kosovën, dorëzuan në Gjykatën Kushtetuese kërkesën e cila kontestonte zgjedhjen e Hashim Thaçit president të Kosovës.
Opozita vlerësoi se janë shkelur procedurat në seancën për zgjedhjen e kreut të shtetit. Një nga shkeljet e detektuara sipas opozitës, ishte prania e 120 deputetëve në sale, ku në fakt aty ishin 119, ngaqë Ramush Haradinaj kishte dorëzuar mandatin një seancë më herët.
Vendimi i Gjykatës Kushtetuese ka ngjallur reagimin e partive opozitare, por edhe të analistëve në vend.
Haxhiu: Regjimi autoritar duhet hequr veç përmes shesheve
Deputetja e Vetëvendosje-s, Albulena Haxhiu, vendimin për papranueshmëri të kërkesës së opozitës e konsideron për keqardhje, pasi sipas saj, nuk ka as shpjegim profesional e kushtetues.
Haxhiu, thotë se është e dhimbshme se si ata që paguhen me parat e taksapaguese kosovarë ndikohen nga pushteti dhe ca burokratë ndërkombëtarë.
“Vendimi i sotëm i gjykatës së kapur kushtetuese ka për qëllim mbajtjen me dhunë të këtyre njerëzve në pushtet. Përmes Gjykatës Kushtetuese po tentojnë ta gjejnë shpëtimin. Meqë ky regjim autoritar ka kapur secilin institucion të pavarur nuk ka zgjidhje tjetër: këta duhet hequr përmes shesheve. Vetëm kështu e mbrojmë territorin, sovranitetin, institucionet e Republikën!”, thotë Haxhiu, për tesheshi.com.
Ndaj vendimit të Kushtetutës ka reaguar edhe partia tjetër opozitare, Aleanca për Ardhmërinë e Kosovës e cila përmes një deklarate dërguar mediave ka thënë se Thaçi nuk është figurë unifikuese në postin e presidentit.
Sipas AAK-së, edhe vendimi i Gjykatës Kushtetuese që hodhi poshtë pretendimet e opozitës, nuk është i drejtë.
“Votimi i Thaçit, është bërë edhe në kundërshtim me Kushtetutën e Republikës së Kosovës dhe besojmë se vendimi i sotëm i Gjykatës Kushtetuese nuk është i drejt. Për sa i përket një veprimi të përbashkët opozitar në ditën e betimit të Presidentit, deri me tash nuk pasur një diskutim apo vendim për këtë çështje”, thuhet në reagimin e AAK-së.
Analistët: Vedimi shumë konfuz
Analisti Arben Qirezi, thotë se edhe pse në vendim të Kushtetuteses thuhet se kërkesa është e papranueshme, aktvendimi e hedh poshtë kërkesën duke e interpretuar vendimin e 2011- tës të Gjykates lidhur me rastin Pacolli.
“Pra është vendim shumë konfuz. Kanë mundur thjesht të thonë se vendimi I vitit 2011 është i pazbatueshëm për shkak se po të zbatohej, cenohet funksionaliteti i shtetit dhe të interpretojnë kushtetutën në mënyrë tjetër prej asaj që është interpretuar në vitin 2011. Pra, me këtë do të duhej të thonë se vendimi i 2011-tës nuk mund të paraqesë presedan, sepse në atë rast do të duhet të ndryshohet kushtetuta”, thotë Qirezi, për tesheshi.com.
Ja ç’thonë Mustafa e Veseli për vendimin e Kushtetueses
Vendimin e Gjykatës Kushtetuese e ka komentuar edhe kryeministri i vendit, Isa Mustafa, i cili ka thënë se që nga dita e parë e kanë ditur e ka ditur se nuk ka pasur shkelje procedural lidhur me zgjedhjen e Thaçit president i vendit.
Ndërsa, kryekuvendari, Kadri Veseli ka kërkuar të respektohet vendimi i Kushtetueses, që e legjitimojë zgjedhjen e Thaçit në pozitën e presidentit, duke thënë se vendimi tregon se Kuvendi ka respektuar të gjitha procedurat ligjore dhe kushtetuese në zgjedhjen e presidentit të ri, dhe ka ftuar sërish opozitën në dialog. /tesheshi.com/
