Takimi i dytë mes liderëve të katër partive më të mëdha politike në Maqedoni nuk ka dhënë asnjë rezultat konkret, i cili do të nxirrte vendin nga kriza politike.
Sipas liderit LSDM-së Zoran Zaev dialogu është ndërprerë dhe nuk mund të vazhdojë pa u plotësuar kërkesat e opozitës për formimin e një qeverie kalimtare, e cila përmes institucioneve demokratike do të organizojë zgjedhje të lira dhe transparente.
Zaev thotë se ka një shans të dytë për dialog në takimin i cili duhet të mbahet më 26 maj, por siç u shpreh dhe vetë ai, as atëherë nuk do të bëjë asnjë lëshim nga kërkesat e tyre.
Nga ana tjetër, Luan Tresi nga PDSH u tha gazetarëve se në takimin e liderëve partia e tij ka dhënë disa propozime por nuk dha detaje se çfarë dhe se vallë është pranuar ndonjë propozim i tyre.
Kryeministri Gruevski shfrytëzoi momentin ndërsa Zaev fliste para gazetarëve për tu larguar pa dhënë asnjë sqarim për mediat. /tesheshi.com/
