Udhëheqës të vendeve të Azisë dhe Afrikës bënë thirrje të mërkurën për një rend të ri global, të hapur ndaj vendeve në zhvillim, e që i lë në të shkuarën “idetë e dala mode” të institucioneve të Bretton Woods-it.
Thirrja u bë në hapje të një takimi të vendeve aziatike dhe afrikane në Xhakarta për të përkujtuar 60-vjetorin e një konference që e bëri botën në zhvillim të ngrihej kundër kolonializmit, duke çuar në lëvizjen e të paangazhuarve në kohën e Luftës së Ftohtë.
Samiti pesëditor aziatiko-afrikan mbahet një herë në dhjetë vite, dhe ky është takimi i gjashtë.
Presidenti indonezian, Xhoko Vidodo, u shpreh se ata të cilët këmbëngulnin ende se problemet ekonomike globale mund të zgjidhen vetëm nëpërmjet Bankës Botërore, Fondit Monetar Ndërkombëtar dhe Bankës Aziatike të Zhvillimit ishin të mbërthyer pas ideve të së shkuarës.
“Eshtë e domosdoshme,” theksoi ai, “që ne të ndërtojmë një rend ekonomik ndërkombëtar të ri, të hapur ndaj fuqive ekonomike që po lindin.”
FMN-ja dhe Banka Botërore ishin në qendër të rendit monetar të pas Luftës së Dytë Botërore të krijuar nga Shtetet e Bashkuara të Amerikës dhe Europa në konferencën e Bretton Woods-it në New Hampshire më 1944. /tesheshi.com/
