Dy djem brazilianë, të moshës 7 dhe 9 vjeç, mbijetuan 25 ditë në pyllin tropikal të Amazonës, duke ngrënë fruta dhe duke pirë ujë shiu, thanë autoritetet.
Vëllezërit Glauco dhe Gleison u gjetën 35 kilometra larg vendit të zhdukjes, të kequshqyer, të dehidratuar, por gjithsesi mirë.
“Ata janë të kequshqyer dhe të dehidratuar rëndë, ata janë në spital, por nuk ka asnjë rrezik për jetën e tyre. Ata tashmë po shërohen ngadalë,” tha Januario Carneiro da Cunha Neto, një zyrtar shëndetësor në Manaus, kryeqyteti i shtetit brazilian të Amazonas.
Djemtë, anëtarë të fisit indigjen Mura, u zhdukën më 18 shkurt kur u larguan nga fshati i tyre në rrethin rural të Manicore dhe hynë në një pyll të dendur shiu në kërkim të zogjve.
“Ata mbijetuan nga uji i shiut dhe sorva, një frut vendas i pasur me karbohidrate,” tha Carneiro.
Rosinete da Silva Carvalho, nëna e djemve të gjetur dhe dhjetë vëllezërve dhe motrave të tyre, tha për mediat lokale se ata “ishin mësuar të hanë sorva sepse djali i madh mbante gjithmonë një qese plot me fruta kur shkonte për gjueti”.
Autoritetet tashmë kishin ndaluar kërkimin e tyre, por vendasit nuk u dorëzuan. Ata u gjetën aksidentalisht nga një mik i familjes i cili shkoi në pyllin e shiut për dru. Ai gjeti djalin më të madh që mbante në shpinë më të voglin, i cili ishte bërë shumë i dobët për të ecur.
Djemtë u dërguan në një spital në Manaus, ku po trajtohen për infeksione dhe plagë të lehta.
Rasti i tyre të kujton atë të fillimit të vitit të kaluar, kur piloti Antonio Sena mbijetoi 38 ditë në pyllin tropikal të Amazonës pasi avioni i tij u rrëzua. /tesheshi.com/
