Kreu i Bashkisë së Tiranës Erion Veliaj, ka komentuar protestat e ashpra ndaj tij nga banorë të zonës së “Astirit”, të cilët preken nga ndërtimi i Unazës së Re të Tiranës. Asnjë kthim pas, paçka ankesave – tha Veliaj.
“Njerëzit thonë kur të zhbllokohet trafiku te Shqiponja do të marrë frymë Tirana, por çfarë, do të mbetemi në epokën e gurit, se disa njerëz nuk pranojnë dëmshpërblimin? Nuk ka shans. Shanset janë zero që kjo betejë të ndalet. Kur ka zhvillime, ka disa njerëz që gjenden në situatë të vështirë. Për të gjithë njerëzit që janë prekur do të kenë trajtim edhe më të mirë. Kemi ofruar tre vite qiranë, për ata që nuk kanë asnjë letër që kanë zaptuar tokën e dikujt tjetër në gjurmën e unazës. Ka qenë 2 vite ne do e bëjmë 3 qiranë”, shtoi kryebashkiaku.
Duke kaluar në rrafshin politik, Veliaj ashpërsoi gjuhën ndaj PD-së duke e cilësuar dhe si “shpellare”.
Një pjesë e jona ka parti politike shpellare që shqyejnë dhe dhunojnë njerëzit që punojnë për këtë qytet. Shumica e qytetarëve duan që Unaza e Re të bëhet. Edhe për Bulevardin e Ri ishte e njëjta parti, shpellarë, që shkatërrojnë. Është i njëjti film që e kemi parë dhe ky film përfundon me fitoren e qytetit, të njerëzve të mirë, që duan rendin dhe nuk kanë zaptuar, nuk shqyejnë dhe nuk vijnë nga shpellat”, theksoi Veliaj. /tesheshi.com/
