Kryetari i Bashkisë së Tiranës, Erjon Veliaj, tha se tregtarët të cilët shesin në ambientet e shkollës “Vasil Shanto”, të zhvendosen në tregjet e licencuara nga Bashkia. Veliaj inspektoi nisjen e punimeve për rikonstruksionin e kësaj shkolle 9-vjeçare, ndërsa tha se shitësit ambulantë nuk mund të tregëtojnë produktet e tyre ushqimore në perimetrin e shkollave.
“Shkollat janë institucione arsimore dhe jo tregje. Unë e kuptoj që nuk është e këndshme asnjëherë të shikosh policët bashkiakë që mundohen të lirojnë trotuaret, por duhet të kuptoni që për sa kohë ky qytet i ka tregjet, e ka pazarin e madh, ka disa hapësira të vogla pothuajse në çdo lagje, është shumë e rëndësishme që të shesim aty”, deklaroi Veliaj.
PPor një mesazh kryebashkiaku i Tiranës e ka edhe për qytetarët, të cilët reagojnë përmes rrjeteve sociale sa herë punonjës të policisë bashkiake veprojnë për të liruar trotuaret nga shitësit e ndryshëm.
“Ju kërkoj mirëkuptim të gjithë qytetarëve, që përpara se të kalojmë histeri nëpër rrjete sociale, të kuptojmë se ka një vend ku shitet, ka një vend ku mësohet, ka një vend ku banohet, ka një vend ku ecet. Po ndjekim modelet më të mira perëndimore, ku hapësirat janë të ndara. Ndaj ju kërkoj mirëkuptim që nga perimetri i shkollës ‘Vasil Shanto’, nga perimetri i çerdheve dhe kopshteve, nga trotuaret ku ecin qytetarët, t’i lirojmë këto hapësira pa qenë nevoja që Policia Bashkiake të kërkojë lirimin e tyre”, theksoi Veliaj.
Krahas përmirësimit të infrastrukturës për mësimdhënie, Bashkia e Tiranës do të vijojë mbështetjen me bursa për nxënësit ekselentë. Kryebashkiaku Veliaj deklaroi se për këtë vit janë buxhetuar 3 mijë bursa për më të mirët. /tesheshi.com/
