Erjon Veliaj, ka marrë një vendim që do të trondisë ekuilibrat politikë të kryeqytetit.
Pas deklaratave të njëpasnjëshme të drejtuesve të lartë të LSI-së se kryebashkiaku i ri duhet të zbatojë planin urbanistik të Lulzim Bashës, pasi është miratuar në këshillin bashkiak, Veliaj, jo vetëm që ka rrëzuar planin ekzistuues por ka shkuar në një hap më larg: ka pezulluar të gjitha lejet e ndërtimit e dhëna në Tiranë. Kjo do të thotë se kush ka nisur ndërtesat, ato edhe mund t’i shemben.
Ylli manjani, nënkryetari i LSI-së, deklaroi gjatë një interviste pak ditë më parë se Veliaj e ka planin, pra ndërtimin e bulevardit deri në Paskuqan, ku janë parashikuar edhe ndërtimi i një numri të madh pallatesh. Por kryebashkiaku i ka thënë dje “Jo” që sipas gjasave ka edhe mbështetjen e Edi Ramës. Pritet tani çdo të ndodhë në mbledhjen e parë të këshillit bashkiak.
Marrëveshja
Kryebashkiaku i Tiranës, Erjon Veliaj, ka lidhur një marrëveshje me Ministren e Zhvillimit Urban, Englantina Gjermeni, sipas të cilës do të jete qeeveria dhe bashkia që brenda vitit të hartojnë planin e ri për kryeqytetin.
“Ne parashikojmë që brenda një viti, Tirana të ketë plan zhvillimi të mirëfilltë, që do të jetë programi me të cilin do të zhvillojmë të gjitha pjesët e Tiranës, si ato qendrore, ashtu edhe ato të periferisë e që përbëjnë 24 njësitë e Tiranës. Së dyti, kjo nënkupton që plani ekzistues vendor, vetëm për bashkinë e vjetër të Tiranës, nga dita e sotme nuk është më në fuqi. Nuk është më në fuqi, pavarësisht rezervave personale apo publike që i kemi shpallur edhe më parë për planin klientelist që trashëgoi Bashkia e Tiranës, por nuk është në fuqi edhe për arsyen se sot, Bashkia e Tiranës është një entitet tjetër. Sot ka 24 njësi vendore, shumë prej të cilave nuk ishin pjesë e Tiranës. Kjo do të thotë që edhe sikur të ishte i mirë plani ekzistues, ishte vetëm për një pjesë të Tiranës së vjetër. Nga sot, duke qenë se ka rënë plani i vjetër i zhvillimit, plani i vjetër ndërtimor i Tiranës, pezullohen lejet e ndërtimit deri sa ne të kemi një plan afatgjatë të zhvillimit të qytetit, në bazë të këtij bashkëpunimi me Ministrinë e Zhvillimit Urban”, thotë kryebashkiaku Veliaj.
Nga ana e saj, ministrja e Zhvillimit Urban, Eglantina Gjermeni, theksoi se ka ardhur koha e përfundimit të një kaosi në zhvillimin e territorit dhe zhvillimin urban në Shqipëri.
“Mendoj që Tirana ka nevojë për një plan të zhvillimit të saj, edhe për shkak të hapësirës që ka dhe peshës specifike në zhvillimin kombëtar. Mendoj që gjithë ky proces bashkëpunimi do të jetë i suksesshëm, falë edhe urave të bashkëpunimit, edhe të mëparshme që kemi pasur me Veliajn”, u shpreh ajo.
/tesheshi.com/
