Shkolla e re e rindërtuar “Hoxha Tahsin” do të çelë dyert për një mijë nxënësit e saj në shtator, duke qenë e para ndër 20 objektet shkollore që Bashkia e Tiranës do të ndërtojë në kryeqytet, për shmangien e mësimit me dy turne.
Në shtator pritet të hapin dyert edhe 3 shkolla të reja, “Betim Muço” në Kombinat, “Ardian Klosi” në Njësinë 4 dhe Shkolla e Baletit, e cila është drejt rikonstruktimit të plotë.
Kryebashkiaku i Tiranës, Erion Veliaj, inspektoi punimet dhe siguroi se ajo do të ofrojë kushte bashkëkohore për të gjithë nxënësit.
“Hapja e një shkolle është një gëzim i madh për çdo komunitet. Në Tiranë kemi dy mundësi: o merremi me llafe, o me punë. Ndërtimi i kësaj shkolle është një punë konkrete, e cila ka filluar në më pak se një vit. Do ta mbarojmë në kohë rekord, kemi edhe 3 javë për t’i dhënë dorën e fundit sistemimit të klasave dhe “Hoxha Tahsin” do të jetë padyshim shkolla e parë e 20 shkollave të reja që do të ndërtojmë në Tiranë”, tha Veliaj.
Veliaj deklaroi se parimi i Bashkisë së Tiranës është që çdo ditë të realizohet një punë konkrete në dobi të komunitetit.
“Duke filluar nga muaji shtator do të hapim shkollat ‘Hoxha Tahsin’, ‘Betim Muço’ në Kombinat, ‘Ardian Klosi’ te Bregu i Lumit dhe aktualisht janë hedhur themelet e shkollës ‘Kosova’. Besoj se vetëm kështu ecën përpara Tirana. Sigurisht, Roma nuk u ndërtua në një ditë, as Tirana nuk ndërtohet në një ditë, por parimi është ‘çdo ditë një punë konkrete’. Për sa kohë që vazhdojmë me këtë ritëm, besoj se deri në fund të këtij mandati do të kemi mbaruar me 20 shkollat dhe do të kemi për herë të parë të hequr nga zhargoni i diskutimit publik mësimdhënien me dy turne”, theksoi ai.
Kryebashkiaku u bëri thirrje prindërve të Njësisë Nr.2 që të regjistrojnë fëmijët e tyre në shkollën e re “Hoxha Tahsin”, e cila do të ketë jo vetëm mjedise më të mira studimi, por njëkohësisht edhe më pak nxënës në klasa, duke rritur cilësinë e mësimdhënies.
“Aktualisht kemi disa shkolla të mbingarkuara edhe në Njësinë 2, në Njësinë 8, në gjithë zonën rreth “Pazarit të Ri”, ku janë me dy turne “Fan Noli” dhe Shkolla e Kuqe. Thirrja që kam për të gjithë prindërit, është që kemi një hapësirë fantastike për të bërë regjistrime në shkollën e re “Hoxha Tahsin”. Regjistrimet në shkollën e re tashmë kanë filluar, duke filluar nga data 1 shtator bëhen zyrtare. Kemi mjaftueshëm hapësirë edhe për të çliruar turnin e dytë nga “Fan Noli” dhe Shkolla e Kuqe, ndaj kërkesa ime për gjithë komunitetin është të fokusohen te kjo shkollë. Kjo është një shkollë që ka 20 klasa, 6 laboratorë, 4 kate, palestër dhe të gjitha nevojat bazike për të pasur një hapësirë dinjitoze për mësimdhënien”, u shpreh Veliaj.
Vëmendje i është kushtuar edhe stafit mësimdhënës në këtë shkollë, ku Bashkia e Tiranës në bashkëpunim dhe me Drejtorinë Arsimore Rajonale Tiranë janë duke punuar që disa prej mësuesve më të mirë të kryeqytetit të japin mësim në shkollën e re që do të hapet në shtator.
“Po punojmë me Drejtorinë Arsimore që disa nga mësuesit më të mirë, edhe nga “Fan Noli” apo Shkolla e Kuqe, t’i transferojmë te “Hoxha Tahsin”, për t’u siguruar që jo vetëm të kemi një ndërtesë të mirë, por e njëjta cilësi mësimdhënieje që kërkohet nga shkollat e mbipopulluara të jetë edhe këtu. Prindi që do të regjistrojë fëmijën te “Hoxha Tahsin”, jo vetëm do të marrë ndërtesën më të mirë dhe kushte më cilësore për fëmijën e tij, por sigurisht do të investohet edhe tek mësuesit më të mirë”, u shpreh Veliaj, ndërsa kërkoi bashkëpunimin e prindërve për të dërguar fëmijët e tyre që të studiojnë në shkollat e reja që do të hapen, duke ulur në këtë mënyrë edhe dyndjen e nxënësve vetëm në disa shkolla.
Ai u shpreh se Bashkia po punon që shkollat, kopshtet dhe çerdhet të jenë gati për të mirëpritur nxënësit dhe të vegjlit në shtator. Gjithashtu, Veliaj garantoi se gjatë verës Bashkia e Tiranës po punon që kopshtet dhe çerdhet të qëndrojnë të hapura duke u ardhur në ndihmë prindërve të cilët janë në marrëdhënie pune.
“Çerdhet dhe kopshtet do të jenë të hapura gjatë gjithë muajit gusht. Do të thotë që çdo prind, i cili detyrohet të punojë gjatë muajit gusht, të ketë gjithmonë një mundësi për ta lënë fëmijën në një çerdhe apo në një kopsht të qytetit të Tiranës”, theksoi kryebashkiaku. /tesheshi.com/
