Ka ndërruar jetë një prej personazheve të krimit në Vlorë në post 97-ën, Fotaq Zaharia. Është Drejtoria e Burgjeve që njofton vdekjen e tij në QSUT, teksa ishte prej ditësh në reanimacion me probleme të rënda shëndeti.
Zaharia vuante dënimin me 25 vjet heqje lirie nën akuzat për grabitje dhe pengmarrje pas trazirave të vitit 1997.
I cilësuar gjatë viteve 1997-2007 si “i forti i Vlorës”, për shkak të grabitjeve dhe pengmarrjeve me armë që kryente, ai kaloi dhe në sitën e verifikimit financiar të OFL-së katër vite më parë.
Emri i tij lidhet dhe me një arratisje, atë në datë 17 qershor 2001, ku Zaharia, së bashku me tre të dënuar të tjerë, do iknin nga dhomat e paraburgimit të Komisariatit të Policisë së Vlorë, ku ndodheshim me masë sigurimi “arrest në burg” të dyshuar se kishin kryer disa vepra penale, si “vjedhje” dhe “rrëmbim personash me qëllim përfitimi”.
Ai mbeti i plagosur në këmbë ditën kur u arrestua nga shkëmbimi i zjarrit me policinë, në vitin 2007, ndërsa në vitin 2022 u dëmshpërblye me 13 mije euro me urdhër të Strasburgut.
Tashmë kapitulli i tij është i mbyllur. Por një tjetër kapitull i hapet, ai i llogarisë para Zotit. Aty s’ka Strasburg që i bën derman në llogaridhënie. /tesheshi.com/
