Një panel ekspertësh juridikë dhe mjekësorë ka nisur analizën përfundimtare për të përcaktuar përfundimisht nëse poeti i madh Pablo Neruda u vra gjatë diktaturës së Augusto Pinochet, e cila zgjati nga viti 1973 deri në vitin 1990, raporton AFP.
Për nëntë ditë, ekspertë vendas dhe ndërkombëtarë do të analizojnë rezultatet e një sërë studimesh mbi eshtrat e poetit kilian, i cili vdiq më 23 shtator 1973.
Neruda vdiq 12 ditë pas grushtit të shtetit të gjeneralit Pinochet kundër presidentit socialist Salvador Allende, i cili ishte një mik i madh i poetit.
Gjendet helm në mbetje
Sipas versionit zyrtar të regjimit ushtarak, Neruda vdiq nga përkeqësimi i gjendjes shëndetësore të shkaktuar nga kanceri i prostatës. Në tetor 2017, ai version u përmbys plotësisht nga një grup prej 16 ekspertësh, por ata ekspertë nuk përcaktuan shkakun e saktë të vdekjes së Nerudës. Më pas u hap një hetim i ri mbi helmin (clostridium botulinum) të gjetur në eshtrat e poetit, trupi i të cilit u zhvarros në vitin 2013.
Një grup ekspertësh ka për detyrë të përcaktojë nëse ka prova të mjaftueshme që substanca toksike shkaktoi vdekjen e poetit dhe nëse ajo iu dha Nerudës ndërsa ai qëndronte në një klinikë private në Santiago. Ekspertët do të paraqesin përfundimet e tyre në gjykatë më 7 mars.
Pablo Neruda, fituesi i Çmimit Nobel për Letërsinë në vitin 1971, vdiq në moshën 70-vjeçare ndërsa përgatitej të largohej nga vendi për në Meksikë, ku do të luante një rol të rëndësishëm në kundërshtimin e regjimit të Pinochet. /tesheshi.com/
