Dëmet që shkaktoi uragani “Methju” duke goditur Haitin po marrin dita-ditës përmasa më katastrofike. Në 842 raportohet numri i viktimave, me prirjen për t’u rritur akoma me kalimin e orëve.
Trupat e viktimave filluan të shfaqen në orët e vona të së enjtes, ndërkohë që ujërat u tërhoqën në një pjesë të territorit.
Pjesa më e madhe e viktimave gjendet në fshatra e qyteza në pjesën perëndimore të gadishullit Tiburon, në jugperëndim të vendit.
Përzierja e ujërave i ka hapur rrugën kolerës, prej së cilës kanë vdekur më së paku shtatë persona.
Katastrofa nga uragani vjen në Haiti gjashtë vite pas tërmetit që u bë shkak për mijëra viktima në vend. Një prej vendeve më të varfra të botës, Haiti ende nuk e pati marrë veten nga ky tërmet, i pasuar tashmë nga uragani vdekjeprurës.
“Methju” po godet tani Floridën në SHBA, veçse e ka humbur forcën me të cilën goditi Haitin, duke u kthyer në një stuhi të kategorisë së dytë. /tesheshi.com/
