Pas takimit të djeshëm në kuadër të mbledhjes së kryeministrave ballkanikë në Durrës, me ç’rast kryeministri maqedonas Zoran Zaev dhe ajo e Serbisë Ana Bërnariç u zotuan se do të përpiqen të ruajnë marrëdhëniet e mira fqinjësore, sot ministri serb i Mbrojtjes, Aleksandar Vulin riaktualizoi temën mbi qasjen e Maqedonisë rreth anëtarësimit të Kosovës në UNESCO.
Sipas tij, Maqedonia është e lirë të vendos rreth politikave të veta, mirëpo siç tha ai, “një gjë duhet ta dinë se Serbisë do i pengon nëse Kosova bëhet pjesë e UNESCO-s dhe INTERPOL-it”.
“Maqedonia duhet të vendos vet, mirëpo si ata edhe çdo vend tjetër duhet ta dijë se për ne çështja e UNESCO-s dhe hyrja e Kosovës në INTERPOL është me rëndësi shumë të madhe dhe ne mendojmë se Kosova nuk mund dhe bën të jetë pjesë e atyre organizatave”, ka thënë Vulin.
Ai ka shtuar “marrëdhëniet tona në masë të madhe do të bazohen në këtë”.
“Ne duhet t’i kemi parasysh interesat tona dhe që miqtë tanë duhet të sillen kështu”, ka shtuar Vulin për televizionin serb B92.
Para disa ditësh autoritetet qeveritare të Serbisë kanë tërhequr gjithë personelin e ambasadës së tyre në Shkup me kërcënimin që nëse Maqedonia voton pro anëtarësimit të Kosovës në UNESCO do t’i prishin marrëdhëniet.
Ndërkohë që dje, kryeministrja serbe ka ftuar kryeministrin e Maqedonisë, Zoran Zaev që të mbajnë një seancë të përbashkët qeveritare.
Mirëpo nëse kjo seancë ka për qëllim diskutimin e anëtarësimit të Kosovës në UNESCO ose jo, ende nuk është definuar. /tesheshi.com/
