Gazeta e përditshme e Vatikanit, “L’Osservatore Romano”, kërkon reformë të elitës së Evropës.
“Kriza greke ofron një mundësi për të përcaktuar një koncept të ri të Evropës, me më pak theks në elitat e saj në pushtet”, shkruan “L’Osservatore Romano”.
“Dështimi i Greqisë mund të jetë një mundësi për të përcaktuar një koncept të ri për Evropën”, theksohej në gazetë, një ditë pas referendumit kombëtar në Greqi, që hodhi poshtë një propozim nga kreditorët e vendit.
Ata përfshijnë Fondin Monetar Ndërkombëtar (FMN), Bashkimin Evropian (BE) dhe Bankën Qendrore Evropiane (BQE).
Votimi ka ngritur shqetësimet se Athina mund të largohet nga eurozona dhe monedha e përbashkët. Gazeta shkruan se “projekti evropian ka për të ndryshuar, madje edhe me koston e zgjedhjes së dhimbshme, si dalja e Greqisë nga monedha e vetme”.
“Në një kontinent plot me histori dhe tradita, sfida e vërtetë është pikërisht dorëheqja nga trashëgimia, që e kaluara mbart me vete”, thuhet në artikull.
“Referendumi i së dielës përfshin më shumë sesa propozimet e kreditorëve, por reflekton një kontekst më të gjerë shoqëror, që karakterizohet jo vetëm nga vështirësitë ekonomike, por edhe një mospëlqim për udhëheqjen (evropiane) dhe për institucionet financiare”, shton ajo.
Një çarje mes publikut dhe politikanëve, si në Athinë edhe ndërkombëtarisht, është zgjeruar që pas krizës financiare botërore në vitin 2008.
Kjo çarje ka qenë e “nxitur nga fenomene të tilla si nacionalizmi, ekstremet e konfrontimit dhe shfaqja e forcave politike të reja dhe politikanëve të rinj”, siç është partia kryesore e Greqisë, SYRIZA, e kryesuar nga Kryeministri Aleksis Tsipras.
“Megjithatë, rihapja e negociatave me kreditorët nuk është e pamundur, edhe pse do të jetë e vështirë”, shkruan gazeta, që u sugjeron të gjitha palëve kthim në pikënisje.
Gjithashtu, e përditshmja e Vatikanit shkruan se kriza ka treguar “një nevojë urgjente për një proces të ri integrimi, që shkon përtej bashkimit bankar apo teknikave të bashkimit financiar”.
“Në vend të kësaj, fokusi tani duhet të kthehet në gjetjen e unitetit në çështje të tilla si emigracioni, shëndetësia, komunikimi, hulumtimi dhe një ringjallje e arsimit dhe mirëqënies”. /tesheshi.com/
