E përditshmja izraelite Haaretz ka lajmëruar një ditë më parë se Izraeli ka miratuar planet për të ngritur një lagje banimi mbi rrënojat e një varreze të lashtë muslimane në Jerusalemin Perëndimor.
Gazeta shprehej shkoqur se, “Komiteti për Planifikim dhe Ndërtim i Distriktit të Jerusalemit ka miratuar javën e shkuar ndërtimin në rrënojat e një varreze historike muslimane në Jerusalemin Perëndimor të 192 njësive të banimit, të një hoteli me 480 dhoma, dhe të një qendre tregtare.”
Kundërshtinë më të ashpër ndaj projektit e shprehu një organizatë joqeveritare palestineze, Fondacioni el-Aksa për Vakëf dhe Trashëgimi, që lëshoi një deklaratë, ku thuhej mes të tjerash, “Izraeli ka vazhduar për vite me radhë ta judaizojë varrezën historike Mamilla të Jerusalemit.”
Më tej, deklarata thoshte se, “Varreza do të mbetet pjesë e trashëgimisë tonë islame, me gjithë përpjekjet e Izraelit për ta shtrembëruar historinë arabe dhe islame të Jerusalemit.”
Kjo varrezë ka qenë prej vitesh në shënjestrën e autoriteteve izraelite, që ngahera kanë dashur të ndërtojnë mbi rrënojat e saj. Mes projekteve për të ndërtuar diçka mbi këtë varrezë janë parqe, hotele, muze, shkolla dhe qendra tregtare.
Varreza besohet që daton që në shekullin e shtatë. Një pjesë e saj është shkatërruar tashmë, por për atë çfarë ka mbetur ka patur prej vitesh një fushatë për ta ruajtur prej ndërtimeve mbi të. /tesheshi.com/
