Fillon fushata e arrestimeve të zyrtarëve të korruptuar. Një drejtues i hipotekës së Lushnjes është arrestuar pasi ka marrë për një dokument pronësie rreth 3 mijë euro. Çështjet e pronësisë dhe hipotekat janë janë cilësuar si pjesët më të prekura nga korrupsioni.
Është sërish Lushnja, ku edhe para një viti u arrestua dhe u dënua një drejtoreshë rajonale e arsimit që merrte 3 mijë euro për një vend pune.
Drejtori i Zyrës së Regjistrimit të Pasurive të Paluajtshme Lushnje, Elvis Bajaziti u arrestua me akuzën e korrupsionit pasiv, ndërsa mesditën e së martës ai është shkarkuar nga detyra nga ministri i Drejtësisë, Naço.
“Jemi të vendosur të luftojmë korrupsionin në çdo qelizë të administratës publike. Inkurajojmë organet ligj-zbatuese dhe i mbështesim në goditjen e këtyre fenomeneve”, tha ministri Naço, ndërsa i bëri thirrje qytetarëve të denoncojnë shkeljet të tilla.
Dyshohet se Bajaziti i ka marrë 3000 euro një qytetari në këmbim të një certifikate pronësie. Mbi drejtorin e Hipotekës rëndon edhe akuza e ushtrimit të ndikimit të paligjshëm.
Media opozitare ditët e fundit ka rimarrë sulmin ndaj LSI-së duke përmendur faktin se zyrtarja e lartë e DASH, Victoria Nuland, nuk është takuar me kreun e Kuvendit, Ilir Meta.
Ndërkaq, ambasadorja e Bashkimit Europian në Tiranë, Romana Vlahutin deklaroi se lufta kundër korrupsionit në drejtësi kërkon ndryshime kushtetuese.
Por vetëm kjo nuk mjafton për të rikthyer besimin e qytetarëve, sidomos tek gjyqësori, ndaj Vlahutin këshillon edhe reformim të Këshillit të Lartë të Drejtësisë.
“Reforma në drejtësi është kyçe për integrimin, ndaj dhe ajo kërkon një shumicë të cilësuar në Kuvend. Duhen të bëhen ndryshime në nivel kushtetues sa i takon korrupsionit. Gjyqtarët të jenë sa më transparentë. Mendoj se duhet reformuar edhe Këshilli i Lartë i Drejtësisë. Vetëm kështu mund të rikthehet besimi te qytetarët”, tha Vlahutin.
Ndërkohë, nga Luksemburgu, ku ndodhet për të marrë pjesë në një takim të ministrave të Drejtësisë dhe të Punëve të Brendshme, ministri Nasip Naço deklaroi se reforma në drejtësi do t’i dorëzohet Kuvendit për miratim në muajin tetor. /tesheshi.com/
