Kroacia po tenton të ndërtojë urën Peljashac në Dalmaci, por Bosnja paralajmëron ndërmarrjen e veprimeve diplomatike për të penguar një gjë të tillë. Madje boshnjakët paralajmërojnë se nëse punimet do të vijojnë 60 ditë, do të nisin hapat e parë diplomatikë në raport me kroatët.
“Der Standard” shkruan se ura do duket elegante, me shtylla të bardha në detin e kaltër të Adriatikut.
Ura Peljeshac lidh gadishullin e Dalmacisë me pjesën tjetër të Kroacisë. Në fakt ajo nuk lidh dy vende, por do mbikalojë shtetin fqinj: Bosnjën, për shkak se bregdeti kroat është i ndarë në mes nga një zonë 14 kilometra e gjatë që i takon Bosnjes, konkretisht qyteti Neum.
Kjo është e vetmja mundësi e daljes së Bosnjes në det.
Zagrebi kërkon të ndërtojë urën prej 2007-ës, por projekti është ngrirë, jo vetëm për shkak të mungesës së parave, por edhe se kjo urë më shumë ndan sesa bashkon dy vende.
Bosnja është kundër ndërtimit të urës, deri në momentin kur kufijtë detarë nuk janë përcaktuar. Bëhet fjalë për dy shkëmbinj dhe një pjesë e vogël e ishullit Klek, që nuk dihet se kujt i takojnë: Bosnjes apo Kroacisë.
Punimet për ndërtimin e urës kanë nisur këtë vjeshtë, por Bosnja i është drejtuar edhe Brukselit për bllokimin e tyre. Bosnja kërkon nisjen e bisedimeve për demarkacionin përpara se projekti për urën të marrë jetë.
BE financon rreth 85 % të projektit, që ka një kosto prej 375 milionë euro, çka do të thotë se vendimi i Brukselit për të pezulluar punimet është disi i vështirë.
Boshnjaku Bakir Izetbegovic, ka kritikuar Europën që ka financuar një projekt të tillë, pa diskutuar më parë me Bosnjen.
Në anën tjetër, Bosnja ka probleme të brendshme, pasi përfaqësuesi i tretë i Republikës, kroati Dragan Covic, qëndron katërcipërisht pas ndërtimit të urës.
Ai ka mbështetjen e presidentes kroate Kolinda Grabar-Kitarovic, nëse bëhet fjalë për ndryshimin e kodit zgjedhor.
Pra Covic dhe Grabar-Kitarovic, duket se më shumë i lidh ndjenja e së ashtuquajturës “aleanca etnike”.
Në Sarajevë ekziston edhe frika se gjatësia e urës mund të krijojë problem me anijet e mëdha që do të lundrojnë drejt Neumit.
Kryeministri kroat Andrej Plenkoviç mendon se ura do të ndërtohet, por paralajmëron edhe negociata me Bosnjen.
Demarkacioni mes Kroacisë dhe Bosnjes ka nisur në 1999, por asnjëherë dy vendet nuk kanë nënshkruar ndonjë dokument.
Tashmë Bosnja duket se ka vendosur ti japë fund. /tesheshi.com/
