Mensur Krasniqi
Një muaj pasi që portali tesheshi.com zbuloi skandalin e qeverisë VMRO-BDI lidhur me mbylljen e gjashtë programeve studimore të Universitetit Shtetëror të Tetovës, vjen reagimi i parë zyrtar i USHT-së.
Ky universitet kombëtar shqiptar edhe zyrtarisht ka filluar përgatitjen e procedurës për kushtetutshmërinë e vendimit për mbylljen e fakultetit të shkencave të zbatuara. Sipas tyre lënda është duke u përgatitur nga një ekip profesorësh të fakultetit Juridik dhe e njëjta të hënën do të bëhet publike. Vendimi për ankesë në Kushtetuese vjen pas mbledhjes së fundit të Senatit.
Vërejtjet e këtij trupi të USHT-së kishin të bëjnë me shkeljen e procedurave ligjore në dy pika:
- Ligji është sjellë me procedurë të shpejtuar(ligj special)
- Ligji nuk ka respektuar nenin 40 të Ligjit për arsim të lartë, i cili kërkon që vendimet për shuarjen e një fakulteti fillimisht të dërgohen për të marrë mendim edhe nga Senati i Universitetit.
Pra kjo nënkupton që vendimi i Qeverisë për mbylljen e programeve të zbatuara është i diskutueshëm në aspektin e parimit të ligjshmërisë dhe kushtetueshmërisë sepse nga baza e njëjtë juridike, themeluesi (në rastin konkret Parlamenti i Maqedonisë) nuk mund t’i mbyll programet studimore, por vetëm fakultetin përkatës. Ndryshe, tagër për hapjen apo mbylljen e programeve studimore e ka vet universiteti, nëse për një gjë të tillë vleresojnë vet organet e tij duke respektuar procedurën për akreditim të programeve studimore në këshillin për akreditim të institucioneve të arsmit të lartë.
/tesheshi.com/
