Këshilli Ekzekutiv i UNESCO-s do të vendosë sot në Paris nëse do ta përfshijë në rendin e ditës propozimin e rekomandimit për anëtarësim të Kosovës në këtë organizatë.
Këshilli Ekzekutiv ka 58 anëtarë; 32 anëtarë janë nga shtetet të cilat e kanë njohur Kosovën, dhe rreth njëzet prej këtyre vendeve e kanë miratuar tashmë kërkesën e Shqipërisë për pranimin e Kosovës në UNESCO.
Çështja e pranimit të Kosovës pritet të përfshihet sot në agjendën e diskutimeve, dhe mendohet se do të votohet më 20 tetor, para përfundimit të sesionit të Këshillit Ekzekutiv. Vendimet aty merren me shumicë votash, dhe nëse propozimi pranohet, vendimi përfundimtar mbi pranimin e Kosovës për anëtarësim do të ndodhë në Asamblenë e Përgjithshme të UNESCO-s, që mbahet nga data 3 deri më 18 nëntor të këtij viti.
Konferenca e Përgjithshme ka përfaqësues nga 195 vende anëtare. Çdo vend anëtar ka një votë, dhe vendimi për pranim në këtë organizatë kërkon një shumicë prej dy të tretash.
Kërkesën për pranimin e Kosovës në UNESCO e ka dorëzuar formalisht Shqipëria, dhe është mbështetur nga 45 vende. /tesheshi.com/
