Bordi ekzekutiv i UNESCO-s ka miratuar dje një rezolutë kritike ndaj Izraelit dhe ndaj veprimeve të tij në Bregun Perëndimor dhe në Jerusalem.
Izraeli përshkruhet në këtë rezolutë si një fuqi pushtuese, me një sovranitet të paqenë mbi Jerusalemin.
Vetë Jerusalemi cilësohet si i pushtuar, e Qyteti i Vjetër si “i tëri palestinez”.
Kjo rezolutë u mbështet nga 22 vende, që votuan në favor të saj, ndërkohë që mes dhjetë votave kundër ishin ato të SHBA-së, Gjermanisë dhe Italisë.
Dokumenti i miratuar i kërkon Izraelit t’u japë fund gërmimeve të vazhdueshme, shpimeve, punëve dhe projekteve në Jerusalemin Lindor, duke e akuzuar atë për veprime që e kanë ndryshuar apo synojnë ta ndryshojnë karakterin dhe statusin e Qytetit të Shenjtë.
Rezoluta u mirëprit nga palestinezët, për t’u quajtur një “politizim i panevojshëm i UNESCO-s” nga izraelitët. /tesheshi.com/
