Pedagogët protestues, ata të cilët kërkojnë rritje page më shumë se 15 përqind, pasi kjo kuota ju mundësua, i lëshuan një tjetër ultimatum qeverisë, duke patur tashmë si kryefjalë grevën e urisë.
Kreu i protestës, Sandër Kovaçi, një profesor matematike por me implikime politike, pasi është shfaqur në takimet e Berishës si përkrahës i tij, si dhe ka punuar në SHIK-un e drejtuar nga i ndjeri Gazidede, tha se e mërkura është “afati i fundit” për qeverinë.
‘‘Do presim deri në orën katër përgjigjen e qeverisë. Në grevë do të futen disa pedagogë, rreth 10… është grevë simbolike. Greva do të mbahen në një ambient të brendshëm të universitetit”, tha ai, duke marrë menjëherë një përgjigje kryeministrore me theks të qartë politik.
“Shiksi i NonGratës paska marrë urdhër për t’i dhënë ultimatum qeverisë me grevë urie të pedagogëve!
Grevë urie për rritje rrogash bëjnë vetëm njerëz pa fe e pa atdhe, rublaxhinj pa din e pa iman, foltorexhinj e baltaxhinj që vetëm Shqipërisë e shqiptarëve nuk i shërbejnë!”, ishte përgjigja e hidhur e Ramës. /tesheshi.com/
