UEFA ka njoftuar se arbitri i cili do gjykojë ndeshjen Shqipëri-Serbi, e cila do zhvillohet më datën 8 Tetor në Elbasan Arena. Do të jetë italiani Nicola Rizzoli. Trupa europiane e futbollit ka përzgjedhur italianin për të dhënë drejtësi në duelin e shumëpritur e që është shoqëruar me masa të forta sigurie nga ana e policisë dhe retorika “lufte” nga pala serbe.
Nicola Rizzoli konsiderohet si njëri ndër gjyqtarët më të mirë në botë. Arbitri italian ka gjykuar edhe sfidën finale të kampionatit botëror ndërmjet Argjentinës dhe Gjermanisë në vitin 2014. Gjithashtu, Rizzoli ka drejtuar edhe duelin final të Ligës së Kampionëve ndërmjet Borussia Dortmund dhe Bayern Mynih në vitin 2013.
Në fundjavën që sapo lamë pas, Rizzoli drejtoi derbin ndërmjet Milanit dhe Napolit. Arbitri italian ka mjaft autoritet në fushë dhe personaliteti i tij duket se është parë të jetë i duhuri për këtë ndeshje “të nxehtë”. UEFA ka vendosur për italianin, ndërsa mbetet për t’u parë nëse do të jetë zgjedhje e mirë për një përballje si ajo mes Shqipërisë dhe Serbisë. /tesheshi.com
