Një autobus me udhëtarë nga Kosova që kishin destinacion Slloveninë, është sulmuar mbrëmë në Serbi. Si pasojë e sulmit që u krye me shishe qelqi, xhamat e autobusit janë thyer, duke tmerruar udhëtarët.
Lajmin e kanë konfirmuar edhe autoritetet nga Ministria e Punëve të Jashtme, duke shprehur shqetësim edhe për faktin se ky nuk është sulmi i parë i këtij lloji.
Shqetësimi për udhëtarët ka vazhduar edhe përgjatë rrugëtimit të mëtejmë, ngaqë autobusi po ndiqej me disa vetura pa targa.
Zyrtarët e MPJ-së pohuan se qëllimi i sulmit dhe ndjekjes së autobusit ishte që ai të dilte nga rruga, gjë që do të ishte fatale për dhjetëra personat që ishin në udhëtim.
Kjo nuk është hera e parë që autobusët e Kosovës sulmohen në shtetin e Serbisë.
Ditë më parë, Ministria e Punëve të Jashtme u ka bërë thirrje qytetarëve të Kosovës që të shmangin qarkullimin nëpër territorin e Serbisë, pasi ajo nuk ofron as siguri minimale për ta dhe familjet e tyre. /tesheshi.com/
