Një reagim i fortë amerikan ka ardhur pak orë para protestës së opozitës, ku qartazi e troç jo thjesht dënohet dhuna, por dhe paralajmërohet ndëshkim ndaj saj.
“Shtetet e Bashkuara respektojnë të drejtën demokratike të qytetarëve për të protestuar në mënyrë paqësore. Ju bëjmë thirrje të gjithë pjesmarrësve në protestën e sotme – si qytetarëve ashtu edhe forcave ligjzbatuese – që të përmbahen duke qëndruar larg dhunës. Nxitja e përplasjeve fizike apo hedhja e mjeteve plasëse, bombave molotov dhe gurëve, është jodemokratike dhe e paligjshme. Ata që përfshihen në akte dhune kryejnë një krim dhe duhen vënë përpara përgjegjësisë”, thuhet në një deklaratë të Ambasadës Amerikane.
Më tej, këshillohet ulja në dialog, duke shpalosur kështu qëndrimin amerikan mbi krizën shqiptare. “Shtetet e Bashkuara nxisin të gjitha palët të tregojnë vetëpërmbajtje, të refuzojnë dhunën dhe të përfshihen në një dialog konstruktiv”, thuhet në deklaratë. /tesheshi.com/
