Me pretendimin bazë në ndërtimin e një akuze, sipas së cilës autoritetet shqiptare nuk informuan qytetarët me banim në Greqi mbi masën e re të 17 gushtit, presidenti Meta publikoi një dokument, ku tregohet se ambasadorja e morri njoftimin nga autoritetet e Athinës, porse Tirana zyrtare nuk vijoi informimin.
Këtij pretendimi i është përgjigjur Policia e Shtetit, e cila publikoi njoftimin e datës 6 gusht, ku informohej mbi atë çfarë kishin vendosur autoritetet greke.
“Autoritetet policore greke, njoftojnë se duke filluar nga mbrëmja e sotme e në vijim, nga ora 22:00 deri në orën 06:00, Pikat e Kalimit të Kufirit Kakavije dhe Kapshticë nga pala greke do të jenë të mbyllura për udhëtarët dhe automjetet si në hyrje edhe në dalje të Greqisë.
Pikat e kalimit do të jenë të hapur për qytetarët dhe automjetet çdo ditë nga ora 06:00 deri në 22:00.
Policia e Shtetit fton qytetarët dhe drejtuesit e automjeteve që të shmangin lëvizjet dhe udhëtimet gjatë orarit që Pikat e Kalimit janë të mbyllura pasi mjetet dhe udhëtarët nuk do të lejohen nga Policia Kufitare që të parkojnë apo qëndrojnë në territorin doganor e kufitar.
Gjithashtu Policia e Shtetit njofton qytetarët se duke filluar nga data 16 Gusht 2020, shtetasit që hyjnë në Greqi nëpërmjet Pikës së Kalimit të Kufirit Kakavije dhe Kapshticë, do të karatinohen për 7 ditë.
Lejohet të kalojnë kufirin vetëm shtetas grekë, shtetas shqiptarë e të huaj me leje qëndrimi greke dhe minoritarë me kartën përkatese.
Shtetas të B.E-së apo me leje qëndrimi në vendet e B.E-së dhe vendet e tjera të treta nuk lejohet të hyjnë nëpërmjet P.K.K. Kakavije dhe Kapshticë për në Greqi.
Policia e Shtetit apelon që të gjithë qytetarët të ndjekin udhëzimet e autoriteve për lëvizjet në kufi si dhe të respektojnë me rigorozitet masat mbrojtëse me qëllim parandalimin e përhapjes së COVID-19″, njoftonte policia me datë 6 gusht.
Nga ana tjetër, nga kundërshtarët e Metës po ngre krye logjika: nëse nuk ishin të informuar, përse do dyndeshin në doganë, për çka pasuan radhët e gjata dhe pritja disaditore? /tesheshi.com/
