Miliarderi amerikan dhe pronari i ri i Twitter-it, Elon Musk, la të kuptohet se ekziston mundësia që kompania të shpallë falimentimin.
Në fjalimin e tij të parë drejtuar punonjësve, Musk tha se nuk mund të përjashtonte falimentimin, dy javë pasi mori drejtimin e kompanisë, shkruan Reuters, duke cituar Bloomberg.
Musk paralajmëroi se Twitter nuk do të jetë në gjendje të “mbijetojë periudhën e ardhshme” nëse nuk mund të rrisë të ardhurat nga abonimet për të kompensuar rënien e të ardhurave nga reklamat.
Ai gjithashtu paralajmëroi se kompania mund të humbasë miliarda dollarë vitin e ardhshëm.
Musk, i cili përveç Twitter-it është pronar i SpaceX dhe i një shumice aksionesh në Tesla Motors, deklaroi në e-mailin që u dërgoi punëtorëve se puna nga shtëpia nuk do të lejohet më dhe se ata do të pritet të punojnë të paktën 40 orë një javë në zyrë.
Javën e kaluar, Musk tha se misioni i kompanisë do të ishte të bëhej burimi më i saktë i informacionit në botë.
“Twitter duhet të bëhet burimi më i saktë i informacionit në botë. Ky është misioni ynë”, shkroi Musk në një postim në Twitter, raportoi AP.
Twitter më parë njoftoi se do të fillojë të tarifojë për shërbimin e verifikimit të llogarisë së tij me 7,99 dollarë në muaj.
Paralajmërimi i rregullatorit dhe ndëshkimi i mundshëm
Marrja e trazuar e Twitter-it nga Musk vazhdoi të shkaktojë trazira të enjten, pas dorëheqjes së drejtuesve më të lartë të rrjetit social dhe një paralajmërimi të rrallë nga Agjencia Amerikane e Zbatimit Antitrust (FTC).
“Ne po ndjekim me shumë shqetësim zhvillimet e fundit në Twitter. Asnjë CEO apo kompani nuk është mbi ligjin,” tha një zëdhënës i FTC.
Ai kujtoi se platforma duhet të jetë në përputhje me disa rregulla sipas kushteve të kontratës së nënshkruar me agjencinë për sigurinë dhe konfidencialitetin e të dhënave.
Kjo marrëveshje, e ndryshuar këtë vit, “na jep mjete të reja për t’u siguruar që ato po ndiqen dhe ne jemi gati t’i përdorim ato,” shtoi zëdhënësi, duke aluduar për një gjobë që FTC mund të vendosë.
Pronari i Tesla-s dhe SpaceX pushoi gjysmën e 7500 punëtorëve të kompanisë kaliforniane një javë më parë, dhjetë ditë pasi mori përsipër dhe u bë ekzekutivi i vetëm i saj.
Washington Post shkruan se disa drejtorë janë larguar, duke përfshirë drejtuesit e konfidencialitetit të të dhënave dhe pajtueshmërisë së biznesit, raportoi AFP.
Musk po shqetëson shumë autoritete, reklamues, organizata për mbrojtjen e pakicave dhe përdorues.
Por ai u përpoq vazhdimisht të qetësonte të gjithë duke vënë në dukje se moderimi i përmbajtjes, mbrojtja nga abuzimi në platformë, nuk ka ndryshuar. /tesheshi.com/
