Në tërë Turqinë janë përcjellë dje për në banesën e fundit viktimat e dy shpërthimeve terroriste të së shtunës pranë stadiumit të Beshiktashit.
Ceremoni mortore janë kryer në Stamboll, ashtu dhe në qytetet e tjera të vendit. Veç tyre, ka patur vërshime masive të njerëzve në rrugë, që me flamurin turk në dorë kanë ngritur zërin kundër terrorizmit.
Presidenti i vendit, Rexhep Tajjip Erdogan, ka qenë i pranishëm në ceremoninë mortore të një punonjësi
policie në lagjen Fatih. Ai do të vizitonte më tutje dhe vendin e ngjarjes, ku ndodhën shpërthimet e ku humbën jetën 44 persona, përpos qindra të plagosurve.
Konsujt e përgjithshëm të një numri vendesh po ashtu kanë vizituar vendin ku ndodhën shpërthimet. Përfaqësuesit diplomatikë të SHBA-së, Gjermanisë, Francë dhe Britanisë së Madhe, mes të tjerëve, kanë bërë atje homazhe.
Ndërkohë, në një dalje para gazetarëve, zëvendëskryeministri turk, Numan Kurtulmush, tha se Turqia priste më shumë mesazhe solidariteti nga bashkësia ndërkombëtare.
Aktet terroriste të së shtunës qenë të fundit të një serie të gjatë shpërthimesh që e kanë goditur Turqinë në më tepër se një vit. /tesheshi.com/
