Forcat ajrore turke kanë rrëzuar sot në mëngjes një avion rus pasi ai ka shkelur hapësirën ajrore pranë kufirit sirian.
Lajmi i dhënë deri minutat e fundit fliste për një avion të paidentifikuar, por burimet pranë presidentit turk, Rexhep Tajjip Erdogan, sapo kanë sqaruar se bëhet fjalë për një avion rus të tipit SU-24.
Avioni luftarak rus është paralajmëruar përpara se të goditet. Dy pilotët kanë mundur të hidhen me parashutë.
Kryeministri dhe presidenti turk janë informuar nga shefi i Shtabit të Përgjithshëm, Hulusi Akar, për ngjarjen. Davutogllu i ka urdhëruar forcat turke të veprojnë sipas kornizës së NATO-s dhe OKB-së.
Ndërkohë, ka ardhur dhe reagimi i parë nga Ministria ruse e Mbrojtjes. Sipas saj, avioni rus SU-24 nuk e ka shkelur hapësirën ajrore turke; ai ka qenë në lartësinë 6000 metra. Në lidhje me pilotët, ajo e pohon hedhjen e tyre me parashutë, por pa qenë në gjendje të thotë nëse ata janë gjallë apo jo. /tesheshi.com/
