Forcat turke të sigurisë kanë kapur komandantin kyç të grupit terrorist IS në veri të Sirisë. Lajmin e bën të ditur ministri i brendshëm i Turqisë, Suleyman Soylu.
Yusuf Huba, i njohu me emrin e koduar si Abu Jihadeddin Nasser al Ubaydi, ishte i kërkuar për kryerjen e 20 sulmeve në vende të ndryshme dhe si organizatori dhe trajneri më i njohur i IS-it për sulme vetëvrasëse.
Ministri i brendshëm deklaroi se terroristi ishte përgjegjës për një sulm me bomba në Rusi në 2018 dhe si dhe një sulm ndaj një qendre tregtare në Hamburg të Gjermanisë.
“Ai ka trajnuar aktivistët militantë në të gjithë botën përmes internetit dhe trajnimit ushtarak në terren, ka mësuar shndërrimin e automjeteve në bomba, si dhe vrasjet përmes helmimit,” tha ministri Soylu.
Ai shtoi se marrja në pyetje e tij ishte në vazhdim e sipër dhe po zhvillohej në një zonë të Sirisë që ndodhet nën kontrollin turk.
Kujtojmë se Turqia është një nga vendet më të goditura nga IS-i, me 10 sulme vetëvrasëse, shtatë sulme me bomba dhe katër sulme të armatosura që vranë 315 njerëz dhe plagosën qindra.
Deri tani, brenda dhe jashtë vendit Turqia thotë se ka neutralizuar 3.500 terroristë dhe ka arrestuar 5.500 sosh. /tesheshi.com/
