Prokuroria Publike e Stambollit ka dalë me një version zyrtar lidhur me vdekjen e gazetarit saudit Jamal Khashoggi.
Ai është vrarë sipas një plani të parapërgatitur, duke u mbytur sapo ka hyrë në konsullatë dhe më pas kufoma e tij është zhdukur duke u copëtuar – është versioni i autoriteteve turke.
Tashmë çështja është se ku janë pjesët e trupit.
Ndërkohë, në të parin reagim, zëdhënësi i Partisë për Drejtësi dhe Zhvillim (AK Party), Ömer Çelik tha të mërkurën se gazetari saudit Jamal Khashoggi nuk mund të ishte vrarë pa urdhër nga nivele të larta.
Duke folur për gazetarët në Ankara, Çelik tha se nuk ishte e mundur që zyrtarët sauditë ende nuk e kishin gjetur trupin e gazetarit.
“Ne duam të dimë ku është trupi i Khashoggi. Ne duam që autoritetet tona të marrin informacion rreth asaj se kush janë bashkëpunëtorët vendas”, tha Çelik.
Turqia po kërkon ekstradimin e 18 të dyshuarve të arrestuar në Arabinë Saudite për vrasjen e gazetarit. /tesheshi.com/
