Ankaraja zyrtare është shprehur hapur kundër vendimit të Tajlandës për t’i kthyer me forcë në Kinë diçka më tepër se 100 ujgurë.
Në një deklaratë të lëshuar sot nga Ministria e Jashtme turke, Tajlanda akuzohet se po vepron në shpërfillje të rregullave ndërkombëtare që rregullojnë statusin e refugjatëve.
Në deklaratë thuhet mes të tjerash se, “Turqia ka mësuar me pikëllim të madh se 115 turq ujgurë u dërguan në një vend të tretë përkundër vullnetit dhe dëshirës së tyre. Ne e dënojmë praktikën e qeverisë tajlandeze, që është kundër ligjit ndërkombëtar të të drejtave njerëzore.”
Trajtimi i muslimanëve ujgurë nga qeveria kineze është një çështje e ndjeshme e politikës së jashtme turke, dhe ngjarjet e fundit kanë sjellë një tensionim të marrëdhënieve mes dy shteteve.
Ndërkaq, mbrëmjen e së mërkurës një numër protestuesish turq kanë sulmuar konsullatën tajlandeze në Stamboll, në përgjigje të vendimit të Bangkokut për riatdhesimin e ujgurëve.
Vendimin për kthimin e ujgurëve në Kinë e kanë dënuar dhe një numër organizatash ndërkombëtare. Agjencia për refugjatët e Kombeve të Bashkuara u shpreh se qe e alarmuar nga vendimi i Tajlandës për përzënien e ujgurëve.
“Ne jemi të tronditur nga ky deportim i rreth 100 njerëzve, dhe e konsiderojmë atë një shkelje flagrante të ligjit ndërkombëtar,” tha një zyrtar i UNHCR-së.
Kryeministri tajlandez e mbrojti vendimin, dhe shtoi se nuk ishte faji i Bangkokut nëse ata do të përballeshin me probleme. /tesheshi.com/
