Një 19-vjeçar, i cili u arrestua pasi qëlloi tre herë pas shpine një taksist 44-vjeçar dhe më pas e grabiti, ka bërë bujë në Turqi, pasi i ka thënë viktimës se “nuk duhet t’u besosh të gjithëve”, referuar vetes së tij, pabesisë që e karakterizonte.
Ngjarja e kapur nga kamerat e sigurisë ka ndodhur mbrëmjen e 31 janarit në Izmir, kur 44-vjeçari Oguz Erge është ndalur për të marrë 19-vjeçarin.
Në video shihet 44-vjeçari teksa ndalon në pikën që i ka treguar 19-vjeçari dhe e informon se kanë mbërritur në destinacion. Por kur 19-vjeçari e pyeti “sa të detyrohem?” dhe përpara se 44-vjeçari të përgjigjet, i riu mund të shihet duke e qëlluar tre herë dhe më pas duke kërkuar para në xhepat e tij dhe thënë me sarkazëm “221 euro vëlla”. Pos kësaj, i thotë dhe fjalët “nuk duhet t’u besosh të gjithëve”.
https://twitter.com/i/status/1752977142890082467
Siç rezultoi nga hetimet e policisë, 44-vjeçari, kur është ndalur për të marrë 19-vjeçarin, ka komentuar faktin se i riu ka qenë me maskë. “Jam i sëmurë, prandaj po e mbaj”, mësohet se ka thënë 19-vjeçari, ndërsa taksisti është përgjigjur se “askush nuk do t’ju marrë nëse mbani maskë. Por a duhet t’i lëmë njerëzit në rrugë në një mot të tillë? Është acar.”
44-vjeçari u dërgua i plagosur rëndë në spital dhe pak orë më vonë u nënshtrua plagëve të marra, siç njoftoi ministri turk i Shëndetësisë.
Pasi u njoftua policia, oficerët shqyrtuan 110 orë pamje nga 70 kamera sigurie dhe përfundimisht e gjetën 19-vjeçarin.
Në banesën ku u arrestua u gjetën arma, karikatorët dhe paratë që kishte vjedhur.
Në deklaratën e tij të parë, 19-vjeçari dyshohet se ka thënë se nuk ka hyrë në taksi me qëllim grabitjen, por se ajo që ka ndodhur ka ndodhur… spontanisht. /tesheshi.com/
