Gjykata Turke liron nga akuza 63 persona të arrestuar në operacionin “Balyoz” (Çekani), për planifikim dhe tentativë për ‘Grusht Shteti’, raporton Anadolu Agency (AA).
Të pandehurit, në mesin e të cilëve edhe Gjeneral-Majori në pension Levent Ersoz, janë liruar pasi nuk është provuar përfshirja e tyre në veprën penale të tentativës për përmbysje të qeverisë së kryeministrit Rexhep Taip Erdogan, sipas agjencisë në fjalë.
Në shtator 2012, gjykata në Silivri, qytet në afërsi të Stambolli, dha dënimin me 13-20 vjet burg për 326 pjesëtarë të ushtrisë, të cilët u shpallën fajtorë për “Grushtet”.
Pas kësaj, Gjykata turke e Apelit, në tetor 2013, me disa modifikime konfirmoi dënimin për 237 të akuzuarve për komplotin ushtarak “Balyoz” (Çekani).
Më pas, në qershor të vitit 2014, Gjykata e Lartë e Turqisë vendosi se ishin shkelur të drejtat e 230 oficerëve të cilët ishin dënuar më parë me burg, që hapi rrugën për rigjykim.
