Kryeministri Alexis Tsipras ka deklaruar se do të nisë negociatat me BE-në për të gjetur zgjidhje si për çështjen e kësteve por edhe negocimin e borxhit.
Tsipras ka telefonuar presidentin e Francës Hollande ku i ka kërkuar që të nisin bisedimet. “Demokracia nuk mund të kërcënohet” ka thënë Tsipras, i cili duke ju drejtuar atyre që kanë votuar PO ka deklaruar se të gjithë janë fitues.
Ndërkaq ministri i Financave, deklaroi në një konferencë për shtyp se “JO”-ja greke është një “PO” për ndryshimin e politikës dhe rritjes së besimit në Europë.
“Njerëzit thanë ‘JO’ të guximshme. Do zgjasim dorën e bashkëpunimit me partnerët tanë. Duam të shërojmë edhe plagët për Europën. Kreditorët donin të na poshtëronin, kishin planifikuar të mbyllnin bankat tona. Kreditorët refuzuan ndonjë diskutim substancial”- tha Varoufakis.
Çdo gjë tashmë varet nga qëndrimi i liderëve të BE-së, të cilët pas rezultatit te referendumit duket se kane ndryshuar qëndrim. Merkel dhe Hollande takohen të hënën për të biseduar për çështjen greke. Presidenti francez si dhe kryeministri italian kishin deklaruar orët e fundit se pavarësisht rezultatit, vendi i Greqisë është në eurozonë.
Presidenti i BE-së Donald Tusk lajmëroi në një twit se ka thirrur të martën samitin e liderëve të Bashkimit Europian. /tesheshi.com/
