Jo vetëm klandestinët: edhe emigrantët që hyjnë rregullisht në Shtetet e Bashkuara janë një kërcënim për sigurinë kombëtare. Deklarata nuk mund të vijë tjetër veçse nga Donald Trump, kandidati republikan për garën e Shtëpisë së Bardhë, i cili nuk ka të ndalur në retorikën e tij populiste. Nëse nga njëra anë, në emër të unitetit të partisë, ai ishte i detyruar të mbështeste publikisht rizgjedhjen në Kongres të dy “krye-rivalëve”, nga ana tjetër ai përgënjeshtron veten në përpjekjet për të qenë politikisht korrekt, pasi i rikthehet sulmeve ndaj emigrantëve dhe refugjatëve.
Duket se Trump është i përfshirë nga dilemat, e duket se nuk e ka vendosur ende se cilën rrugë duhet të mbajë për të shkuar drejt Shtëpisë së Bardhë. Zgjedhjet janë të gatshme: ose të përshtatet me mjedisin politik republikan që nuk e ka mbështetur kurrë, ose të vazhdojë të flasë me deklarata kundërthënëse që kanë ndezur polemika që në nisje të fushatës.
Gjithsesi, së fundmi, edhe manjati që zakonisht flet atë që mendon për momentin, po bindet se rruga e unitetit rreth partisë është më e nevojshme se kurrë, për shkak se Hillary Clinton tashmë është bërë e frikshme në shifrat e sondazheve. Ish-zonja e Parë është në krye, dhe me shumë diferencë, në të gjitha sondazhet, ndërsa kandidati republikan po paguan një çmim shumë të lartë për polemikat e hapura nga ai vetë por edhe për përplasjen me “gjeneralët” e partisë.
Ata që në konventën e Cleveland vendosën të mos i hapin luftë, mbeten të ndarë me të në pozicionime dhe mënyrën e të bërit të gjërave.
Kështu shpjegohet nga analistët zmbrapsja e famshme e Trump që, pasi e kishte mohuar kategorikisht, dha mbështetjen për rizgjedhjen jo vetëm të kryetarit të Dhomës së Përfaqësuesve, Paul Ryan, por edhe për atë të senatorit John McCain. Ky hap që i ka kushtuar shumë manjatit të pasurive të paluajtshme në fushën e krenarisë, pasi ai nuk e ka falur kurrë Ryan mbështetjen e vonshme që dha për kandidaturën e tij.
Imazhet dhe shprehjet e kandidatit flasin më shumë se çdo përshkrim: Trump, gjatë një tubimi në Uiskonsin, lexon një copë letre në të cilën dikush ka shkruar ekzaktësisht atë që ai duhet të thojë, në mënyrë që të shmangen surprizat dhe përplasjet. Duke folur për McCain, ai vlerëson shpirtin e tij të shërbimit dhe sakrificës si ish-ushtarak, por edhe si politikan. E kjo pasi me javë të tëra kishte vendosur në dyshim statusin e “heroit të luftës” për senatorin e Arizonës, “duke e akuzuar” se kishte rënë rob në Vietnam. Këto fjalë ngritën një stuhi të vërtetë në atë kohë, duke marrë kritika në të majtë dhe në të djathtë.
Por, ndërkaq, në një tjetër tubim, në Portland, në Maine, Trump i rikthehen edhe njëherë kalit të tij kryesor të betejës në fushatën elektorale: emigrantëve. A i është kthyer pa bërë asnjë hap pas: edhe ata që kanë hyrë në Shtetet e Bashkuara në mënyrë të ligjshme mund të përbëjnë një rrezik, sidomos nëse vijnë nga disa vende të caktuara. Jo vetën nga Siria, Iraku, Afganistani, Jemeni dhe Somalia, por edhe nga Maroku, Filipinet, Pakistani dhe Uzbekistani. (batuta e radhës për të pranishmit ishte “por ku ndodhet Uzbekistani?”.
“Jemi duke lejuar të hyjnë në vend shumë njerëz nga vende terroriste, njerëz që nuk duhen lejuar për shkak se është e pamundur t’i kontrollosh”, ka shtuar Trump. “Nuk ka mënyrë për t’i kontrolluar, nuk e kemi idenë se kush janë. Ky mund të jetë kali më i madh i Trojës në histori”. Në fund edhe një sulm ndaj rivales, Klinton: “Ajo dëshiron t’i lejojë të gjithë të hyjnë, me qindra mijëra persona. Kjo nuk ka të bëjë fare me politikën, ka të bëjë me budallallëkun”.
Përgatiti: Juli Prifti – /tesheshi.com/
