Nga Saimir Sulaj/ Washington
Në Gjermani u mbajt sot takimi më i shumëpritur i momentit mes udhëheqësve më të mëdhenj politikë botërorë. Presidenti amerikan Donald Trump shtrëngoi duart me homologun rus Vladimir Putin, gjatë një takimi të shkurtër në Hamburg të Gjermanisë, aty ku po mbahet samiti i G20-ës.
“Me Vladimir Putin kemi biseduar disa herë në telefon deri më tani. Kemi pasur biseda shumë të mira. Do të kemi një bisedë tjetër tani në këtë takim. Këto takime do të vijojnë. Ne mezi presim që shumë gjëra të mira të ndodhin, për Rusinë, për SHBA-në dhe për këdo që është i shqetësuar për këtë.”, – tha Trump para mediave.
“Zoti President ne kemi folur disa herë në telefon. Por bisedat përmes telefonit nuk janë kurrë të mjaftueshme. Takimet janë pozitive për diskutimin e të gjitha çështjeve dypalëshe.”, – iu drejtua Presidenti rus homologut amerikan Trump.
Të pranishëm në takim ishin ministrat e Jashtëm të dy vendeve respektive, ai rus, Sergey Lavrov dhe sekretari amerikan i Shtetit, Rex Tillerson.
Trump dhe Putin takohen në një moment kritik për Presidentin amerikan në lidhje me marrëdhëniet me Rusinë. Në SHBA, çdo ditë e më shumë shtohen dyshimet për ndërhyrjen e Rusisë në zgjedhjet presidenciale amerikane vitin e kaluar, në favor të Trump, i cili u zgjodh në krye të Shtëpisë së Bardhë. Gjithashtu, një prokuror i posaçëm po heton përfshirjen e zyrtarëve dhe ish-zyrtarëve të lartë të zotit Trump, në takime me zyrtarë rusë. Një hetim tjetër vijon edhe ndaj vetë zotit Trump, në lidhje me mundësinë që ai të ketë penguar hetimet e kësaj çështjeje. Të gjitha këto, mund të çojnë deri në propozimin nga Kongresi për shkarkim të zotit Trump, ose ajo që njihet me termin “impeachment” në SHBA./tesheshi.com/
