Reali dhe Atletiko përballen këtë pasdite në “Santiago Bernabeu”; një tjetër faqe në librin e armiqësisë së tyre futbollistike.
Në kampionatin spanjoll luhet java e 31-të, një javë që vë përballë dy ekipet e kryeqytetit të Spanjës. Një ndeshje që vlen më shumë për Realin, që rrezikon të lërë kreun nëse humbet sot.
“Nëse Reali kërkon ta rimarrë kurorën e ligës, duhet të mposhtë Atletikon, ndërsa një barazim apo humbje do t’i jepte Barcelonës jo vetëm një shtysë morale, por dhe kreun e renditjes,” shkruan e përditshmja Marca.
“Dy finale të Champions League-s të humbura, një rivalitet i gjatë historik…, ka shumë arsye për adrenalinë për djemtë e Diego Simeone-s,” vazhdon e përditshmja sportive spanjolle.
“Asnjë ekip nuk e ka bërë Realin të vuajë aq shumë në vitet e fundit sa Atletiko, që në fakt ka fituar në të tre vizitat e fundit në ‘Santiago Bernabeu’,” kujton i njëjti burim.
Derbi nis në orën 16:15. “Zinedine Zidane ka një skuadër të plotë nga mund të zgjedhë, me përjashtim të francezit Raphael Varane. Ndeshja e mesjavës kundër Leganesit i dha mundësi trajnerit francez t’i lërë pushim yjet, që do të jenë të freskët në këtë ndeshje. Me gjithë këto faktorë në favor të Zidane-it, nivelet e vetëbesimit mund të jenë të lëkundura,” shkruan një tjetër e përditshme sportive spanjolle, AS.
Sigurisht që favoritë janë pritësit, por askush nuk duhet të presë që mysafirët të qëndrojnë duarkryq. Ëndrra për titull e tyre ngjan të jetë shuar, por kur vjen puna te Reali, në punë nuk hyjnë llogaritë: kërkohet veç fitorja! /tesheshi.com/
